Siman pasa diabierna tabatin no habrimento di buzon pero di dropbox di tur e companianan cu a expresa interes den operacion di e facilidadnan di Refineria di Aruba.
Diabierna ultimo pa 11’or di mainta e proceso a cera oficialmente y pa 3’or di atardi Managing Director di RDA Rennie Arends hunto cu Notario Chamila Tromp, asisti pa su Compliance Officer a efectua apertura di e Dropboxnan.
Prome Minister Evelyn Wever Croes a splica cu e proceso tabata uno completamente digital, pues ningun documento a pasa di man pa man. Cada interesado den e proceso aki tabata tin su propio Dropbox den cual e tabata por a suministra tur documento pidi. Ningun otro persona fuera di e interesado y notario tabata tin acceso na e Dropbox. Esaki tabata pa garantisa integridad di cada Dropbox. Den cuadro di transparencia den e habrimento di e Dropboxnan, tur interesado a haya e linknan via cual nan por a sigui e proceso di habrimento di e Dropboxnan. Prensa tambe por a presencia e acto aki.
Segun e mandatario a splica, na final a resulta cu tabatin un total di 57 interesado pa sigui cu e refineria mientras cu pa e proceso di un otro tipo di industria na e area ey, cu ta genera cupo di trabou y entrada pa pais Aruba, tabatin 44 grupo interesa.
Prome Minister a splica cu a scoge pa e dos procesonan aki pa motibo cu na Aruba tabatin dos coriente. Un grupo ta interesa pa sigui cu e refineria y e otro grupo ta desea un proceso completamente diferente.
A analisa e documentonan entrega, di loke a pidi, y a conclui cu di e prome grupo, pa sigui cu e refineria, 29 grupo a pasa pa e siguiente fase. Pa e di dos opcion, di bini cu algo diferente, tabatin 44 interesado, di cual 34 a cupli cu nan Due Dilligence y 25 a manda nan Respondent Form.
Awor cu e proceso aki ta tras di lomba, RdA y su Advisory Committee lo mester a scrutina cada un di e documentonan entrega pa e interesado y for di eynan traha un short list cu lo haya un invitacion pa haci un Binding Proposal.
Cu e proceso aki lo cuminsa un era nobo pa refineria di Aruba. Sea ta bini cu un refineria ultra moderno cu e tecnologia state-of-the-art cu lo ofrece empleo cu ta paga bon pa e ciudadano di Aruba of Aruba lo conoce un industria nobo cu lo reemplasa e refineria actual. Den e ultimo caso aki nos ta cera un capitulo di economia di Aruba cu a dura casi 100 aña.
