Venezuela, Kòrsou, Aruba i Karibe Ulandes (Boneiru) ta intensifá nan kolaborashon riba tereno di trabounan aduanero. Esaki mester resultá den kombatimentu di posibel práktikanan di kontrabanda i pa mehorá tráfiko di merkansia.
Durante di un konsulta tékniko riba nivel atministrativo, ku a tuma lugá riba djweps 3 di mei, a papia entre otro tokante interkambio di informashon i identifikashon di personanan di kontakto.
Minister di Finansa Kenneth Gijsbertha a habri e konsulta, ku ta duna implementashon na e akuerdo entre e paisnan manera palabrá riba dia 12 di yanuari 2018 na Aruba i a firma riba dia 7 di aprel na Venezuela. Lo sigui mas konsulta pa yega na otro kombenio riba tereno aduanero, pero tambe riba otro tereno di interes mutuo. E siguiente konsulta ta tuma lugá na Venezuela.
Banda di representantenan di duana di Aruba, Boneiru i Kòrsou, tambe ta tin representashon di otro servisionan di gobièrnu. Venezuela ta un pais bisiña importante di Reino. Un bon koperashon ta importante pa Venezuela i tambe pa Aruba, Boneiru i Kòrsou.
