Diadomigo awor, dia 26 di januari 2020 Fudacion pa Talento Musical “Donny Laclé” ta presenta un biaha mas su Concierto Dominical, su concierto di tur fin di luna.
E luna aki e concierto aki ta cumpli 20 aña caba y esey ta algo di recorda.
E concierto aki a cuminsa na aña 2000 den “The French Steak House” di Manchebo Beach Resort & Spa y a sigui tres aña pasa na Biblioteca Nacional Aruba den G. Madurostraat. E comision organisado ta percura semper pa tin un programa alegre pa e ultimo diadomingo di luna cu por conta semper cu un publico fiel y entusiasma.
Diadomingo awor nos tin un programa hopi varia y sorprendente atrobe.
E concierto ta habri cu e cantante-guitarista Humprey de Miranda.
Humphrey ta biba na Hulanda y ta pasa e lunanan friu na Aruba caminda e ta boluntario na Kibrahacha. Pa diadomingo awor e lo scohe for di su repertorio amplio di musica folklorico di Inglatera, Portugal, Spaña, Indonesia, Hulanda, Surnam, Venezuela, Colombia, Cuba y naturalmente tambe di Antia Hulandes y Aruba.
E siguiente presentacion ta na encargo di Quarter Note, un trio cu ta consisti di Patrick Lee (baho), Rick Tjon (guitara) y Julio Cesar Peralta Villamizar (drums). Nan ta toca musica suave cu Jazz y Bosa Nova.
Ta clausura e concierto cu Grupo Araguaney cu Morela Rangel (harpa) y Sergia Bethencourt (canto, cuarta, guitara). Grupo Araguaney ta conoci pa su musica melodioso di Venezuela y resto di America Latino, interpreta pa e bunita zonido di harpa y e stem fantastico di Sergia.
E comision organisado ta invita pueblo henter pa bin pasa un mainta alegre y sano cu bon musica.
E concierto ta cuminsa 11.00 or en punto y ta caba 13.00 or.
Entrada ta gratis, pero manera semper ta pidi un contribucion pa nos hobennan talentoso.
Sea asina bon di bini trempan, no solamente pasobra e concierto ta cuminsa na ora, sino tambe pa haya un bon luga pa sinta y pa no perde nada di e concierto aki.
Invita bo famia, bo amigonan y bisiña y nos ta topa diadomingo dia 26 di januari na Biblioteca Nacional.