Pa basta tempo caba dr. Horacio Oduber Hospital (HOH) ta ehecuta amputacion di pia. Pero recientemente, esta na fin di october, a realisa un otro primicia mas na HOH unda a opera un pashent, unda pa prome biaha na Aruba ta haciendo uzo di e tecnica yama osteointegracion. Esaki ta un tecnica di cirugia nobo unda ta introduci e protesis den e weso y ta integra esaki cu ne (tecnica di integracion). E protesis ta sali di e cuero y asina tin un conexion directo cu e protesis di cana pa asina tin un control mas preciso na momento di cana. Pues e uzo di un ‘prothesekoker’ lo no ta necesario mas. Problema cu e ‘prothesekoker’ ta e motibo mas grandi pa un operacion asina.
Na nivel mundial e experiencianan ta hopi bon y e operacion aki ta mehora e calidad di bida di hopi pashent. E ciruhanonan di HOH (dr. Caroline Hoenders, ciruhano ortopedico y dr. Yuri Casseres, ciruhano general) y dr. Oscar van Waes, ciruhano traumatologo di Osseointegration Center Rotterdam a colabora intensivamente c’un resultado hopi satisfactorio.
Awo e prome pashent cu a ricibi e operacion aki na Aruba (despues di dos siman) ta cuminsa, poco poco para riba su pia di protesis. E pashent tabata pura p’e momento yega y ta hopi contento cu e resultadonan. Claro cu semper tin chens pa haya complicacion, cual den porcentahe ta comparabel cu e operacionnan di rudia y heup. Dr. Van Waes a bin specialmente Aruba pa dirigi y guia e evento historico aki pa HOH y ta hopi contento cu e colaboracion.
Meta ta pa den futuro sigui amplia y intensifica e cooperacion pa asina yega na un “Osseointegration Centre of the Antilles” (OCA). Nos prome pashent awo lo cuminsa cu su trayecto di rehabilitacion pa asina perfecciona su canamento.
Gradicimento ta bay na Hunta di Directiva di HOH y tambe na e grupo cu a tuma e iniciativa, cual ta consisti di dr. O. van Waes, ciruhano traumatologo di Hulanda, dr. M Paping, dokter di rehabilitacion di Hulanda, dr. C. Hoenders, ciruhano ortopedico na Aruba, dr. Y. Casseres, ciruhano general na Aruba y dr. P.H. Jongerius, dokter di rehabilitacion na Aruba.
Masha pabien HOH y Aruba cu otro paso innovativo y exitoso den cuido medico!
