Prome buelo di ‘Unmanned Aerial Vehicle’ cu lo proteha costa di yegada di indocumentadonan

1949

Gobierno di Aruba a habri e economia interno y ta de-escalando e medidanan di COVID-19. Aruba tin e COVID-19 bou di control y como resultado na e momento aki tin zero caso di COVID-19 riba nos isla. Ta di sumo importancia pa sigui traha y biba den e normal nobo pa por garantisa e economia sigui crece pa e pais y su habitantenan su desaroyo.

Pa haci esaki posibel mester proteha nos pais entre otro di lanchanan cu por yega nos isla cu posibel fuentenan di COVID-19 abordo cu ta drenta e isla na un forma descontrola. Pa evita esaki sosode a haci un peticion di asistencia na Defensa den Caribe pa vigila e fronternan cu unidadnan adicional. Defensa ta bini cu su Unmanned Aerial Vehicle (UAV) cual ta un vehiculo cu lo haci vuelonan riba lama pa vigila y controla e fronternan di Aruba. Awe a ehecuta e prome buelo di prueba cu e UAV.

E UAV lo bula bou di guia y instrucionnnan di Kustwacht di Caribe riba lama pa evita personanan yega ilegal riba e isla. E unidad ta ekipa cu camera abordo cual por detecta señal of botonan cu ta haci intento pa yega cu personanan indocumenta abordo. Na momento cu e UAV detecta algo e ta alerta Kustwacht cual lo dirigi un unidad pa investiga e contacto riba lama. E specialistanan di UAV mester a pasa den un proceso estricto di cuarentena y a biba 14 dia den isolacion. Nan temperatura a ser monitoria y a controla si nan tin sintoma di malesa. Despues di e 14 dia di cuarentana tur persona por a sali pa por cuminsa na e trabou cu nan a bini p’e, cual ta maneha e vuelonan di e UAV.

Prome buelo di ‘Unmanned Aerial Vehicle’ cu lo proteha costa di yegada di indocumentadonan

Posted by 24ora on Wednesday, June 3, 2020

E UAV di Defensa den Caribe ta na Aruba pa vigila Aruba su fronteranan y lama pa protege e pais pa COVID-19-virus no bolbe lanta cabes. Cu e UAV Kustwacht tin ‘eyes-from-above’ y ta un unidad aereo adicional pa yuda cu e trabounan di interceptacion di lanchanan door di Kustwacht prome cu nan por yega tera.