Prome biaha den historia: Economia di Aruba a surpasa esun di Corsou

Cifranan cu Banco Central di Aruba a publica den su “annual statistical digest” di dia 15 di juli ultimo, ta mustra cu den aña 2018 economia di Aruba a surpasa esun di Corsou pa prome biaha den historia. E indicador di economia, Gross Domestic Product, cu ta midi tur actividad economico den 2018 a suma AWG 5,734 biyon na Aruba y NAf 5,609 biyon na Corsou. Te cu aña 2017, e economia di Corsou semper tabata mas grandi cu esun di Aruba.

Den 2017 por ehempel, e GDP di Aruba tabata midi AWG 5,471 biyon, y esun di Corsou tabata midi NAf 5,581 biyon segun e cifranan publica door di e Banco Central di Aruba y e Banco Central di Corsou y Sint Maarten. Mirando cu e cantidad di hende cu ta biba na Corsou ta significantemente mas halto cu na Aruba, ora midi e economia di e paisnan bisiña aki pa cada habitante, e asina yama GDP per capita, e diferencianan entre Aruba y Corsou ta bira substancialmente mas grandi, esta di 51,3 mil florin pa cabes  na Aruba y 35,4 mil florin pa cabes na Corsou, un diferencia di 45,1%. Apesar cu e cantidad di persona bibando na Corsou a baha na 2018 door di entre otro habitantenan cu a muda pa exterior, Corsou ainda tin 47 mil habitante mas cu Aruba (158,7 mil vs 111,8 mil).

Fuera di diferente desaroyo economico negativo na Corsou den 2018 y añanan anterior, e diferencianan den 2018 ta relata tambe na un aumento di prijsnan mas halto na Aruba cu na Corsou, esta di 4,6% na Aruba y 3,6% na Corsou. Fuera di esaki mester nota cu Aruba su estadisticanan di economia a wordo adapta recientemente despues cu Oficina Central di Estadistica, CBS, a calcula e actividad economico di Aruba full di nobo. CBS a constata den e ehercicio aki, cu por cierto a tuma algun aña pa ehecuta, cu e cifranan cu tabata wordo uza den pasado pa estima e grandura di economia tabata mucho abou. Banco Central di Aruba awor ta uzando e cifranan nobo aki cu CBS a calcula aña pasa pa estima e grandura di economia den 2018.

Fuentenan:

https://www.cbaruba.org/cba/readBlob.do?id=5725

https://cbcs.spin-cdn.com/media/publications/20190125_economische_ontwikkelingen_in_2018_en_vooruitzichten_voor_2019_eng.pdf

https://www.cbs.cw/document.php?m=1&fileid=10201&f=df4a73715738a60c2dc2757a04f8a60e&attachment=0&c=2590

https://www.cbs.cw/website/press-releases-2019_3580/item/de-economie-neemt-af-met-22-procent-in-2018_2729.html