Prome avion sin piloto pa ayudo humanitario na mundo tabata di paso na Aruba

2276

Awe tabata na Aruba un avion masha peculiar. Ta trata aki di e prome avion sin piloto (drone), cu ta uza pa ayudo humanitario. A papia cu  Barry Koperberg, kende ta General Manager di Wings For Aid (Reaching People Anywhere)  y el a conta cu ta trata aki di un avion hopi extraordinario cu a baha na nos aeropuerto.

E avion aki por hiba ayudo humanitario tur caminda na mundo. Esey ta pa kibra e ultimo miya pa organisacionnan humanitario. Tin por lo menos 100 miyon di hende cu tin mester asistencia humanitario y 20 miyon di nan ta dificil pa yega na unda cu nan ta. E unico forma cu por yega cerca ta via di helicopter of airdrops.

No tur ora airdrops ta posibel of ta peligroso. Asina ta cu a dicidi di desaroya un drone cu por maneha esaki for di un distancia. Asina a yega na e avion aki cu cada un por carga 6 pa 8 caha, y cada un di e cahanan por contene 20 paki di ayudo.  

Awe nan a bula di Aruba pa Corsou pa un demostracion di nivel halto y diaranson e demostracion aki lo ta den Caribe.

Prome avion sin piloto pa ayudo humanitario na mundo tabata di paso na Aruba

Prome avion sin piloto pa ayudo humanitario na mundo tabata di paso na Aruba. Click e link pa mas https://24ora.tv/2tlvoSa

Posted by 24ora on Tuesday, January 14, 2020

Den e ultimo tres añanan nan ta bezig cu varios test. E produccion di e prome modelo ta andando y esnan envolvi ta spera cu esaki keda cla den luna di juli awo.

Un avion sin piloto

E avion aki por bula sin piloto, mas of menos 250 kilometer, drop e cahanan y bin bek. Esey ta suficiente pa cubri 95 pa 100% di tur luga rond mundo si e tempo ta bon pa bula.

E ta un avion stabiel di un wingspan di 10 meter. For di Aruba/Corsou nan ta bay tur caminda. Nan tin partnernan di logistica y partnernan local, nan ta pone tur cos hunto pa asina por bula y asina yega 250 kilometer y bolbe.

Algo nobo

E ta algo nobo, segun Koperberg, cu lo yuda 20 miyon hende cu no por ricibi asistencia via di e sistema tradicional. Asina a desaroya e solucion aki hunto cu Nacionnan Uni su programa di alimentacion mundial, logistica y Cruz Cora Internacional. Ta wardando pa mira ki ora esaki por bira operacional y lo ta testigo di e demostracion den Caribe diaranson.

Dicon Caribe

Koperberg a menciona cu esaki ta pa diferente motibo. Como cu Aruba y Corsou ta forma parti di Reino, unda cu tur cos a cuminsa y mirando cu nos ta un pais stabiel pa por lanta vuelo.

Caribe ta un region cu a haya desaster. Asina por pensa riba Haiti y St. Maarten cu despues di desaster facilmente por traha un brug uzando e ekipo aki. E tin dos rason pa uzo. E tin conexion cu Hulanda y tin un demanda pa esaki su uzo.

Permiso special?

Pa e avion por bula, mester naturalmente un permiso. E regulacion aki ta wordo traha. Mundialmente, entrante juni di e aña aki lo tin regulacionnan door di IASA, FAA, etc. E ta keda na e discrecion y autoridadnan di e pais. Pero probablemente lo adopta e regulacionnan.

Asina por pidi permisonan special pa bula y hasta pa bula sin tripulacion. Esaki sigur ta algo nobo y mester tin bon asociacion cu autoridadnan di aviacion pa asina yuda esnan den necesidad.

Prome avion

E avion (drone) cu a bin Aruba ta e prome di su construccion. E tin un safety pilot abordo pa percura cu  tin e sistema automatico cu por bula e drone y tambe tin un piloto di siguridad. Pa mira asina con e cahanan ta drop, pasobra e cahanan ta traha sin parachute.

Esaki ta specialmente traha pa ayudo humanitario.

E avion a sali pa Corsou pa asina sigui cu e testnan necesario. Segun Koperberg, e piloto a inform’e cu tin biento duro y por dura 40 minuut pa yega Corsou, caminda nan lo baha na Hato y lo wordo ricibi pa Kustwacht.