Prome avion di JetAir Caribbean a baha na Curacao International Airport

E prome avion Foker 70 di JetAir Caribbean a baha na e aeropuerto di hato diaranson anochi. E avion, un ex KLM cityhopper, cu un capacidad di asiento di 80 pasahero, despues di un mantencion riguroso na e servicionan di Fokker na Asia, via Merca, a yega Corsou.

Na Merca e avion a ricibi e colornan di JetAir. JetAir ta bay opera bao di e licencia di United Caribbean Airlines, un operador cu recien a lanta. JetAir ya caba for di October 2018, ta bezig cu e proceso pa obtene e Airline Operating Certificate (AOC) y cu binida di e avion, nan lo pasa den e ultimo fasenan pa obtene e AOC. E aerolinea ta spera di ricibi tur permiso necesario durante e luna di April, pa asina nan por cuminsa cu e actividadnan comercial. Durante di e luna di April ta bay tin e yegada di e di dos avion Fokker 70 di JetAir na Corsou.

E avion aki lo sirbi como capacidad di reserva y ta destina na garantisa e rendimento na tempo pa operacionnan den futuro. E compania lo enfoca den e conexionnan directo enter Corsou y e region y specificamente riba e rutanan tradicional cu tambe a wordo uza pa companianan anterior y pa cual semper tabata tin hopi demanda. E compania ainda no kier publica detayenan exacto, pero kier revela cu e rutanan manera Trinidad, Jamaica, Haiti y Medellin lo cuminsa pronto. Benta di e pasashinan lo cuminsa manera cu e compania tin mas claridad ora cu nan emiti e AOC. Te asina leu mester tene pasenshi.