Dia 7 di januari ultimo Minister van Engelshoven di Educacion, Cultura y Ciencia di Hulanda a anuncia cu e programa ‘Island(er)s at the Helm: Co-creating sustainable and inclusive solutions for social adaptation to climate challenges in the (Dutch) Caribbean’ ta un di e dos programanan cu a haya fondo di e programa di investigacion Caribense di ‘Nederlandse Organisatie voor Wetenschappelijk Onderzoek (NWO).
E enfasis di e programa di NOW ta pa fortalece e sistema di conocemento y pa implanta investigacion cientifico den Caribe Hulandes. NWO ta desea pa logra esaki door di dos programa grandi di investigacion multidisciplinario, cu ta ser ehecuta y ancra den e region mes. E programa di investigacion ta enfoca riba cuestionnan di importancia social grandi pa Caribe. E ta promove traspaso di conocemento pa medio di educacion y colaboracion comunitario. Nunca prome NWO a otorga fondo pa programanan di e grandura aki den e parti Caribense di Reino Hulandes.
E programa “Isleñonan na Timon” ta lidera pa Dr. Francio Guadeloupe (Universidad di Amsterdam/ KITLV), cu co-aplicantenan Prof. dr. Corinne L. Hofman (Universidad di Leiden/ KITLV), Dr. Antonio Carmona Báez (Universidad di St. Martin), y Prof. dr. ir. Filomeno A. (Boey) Marchena (Universidad di Korsou).
Di tempo di e prome habitantenan riba e islanan, orcan y e destruccion di aereanan costal tabata tin consecuencia ecologico y social impactante riba Caribe (Hulandes). Nan tin efecto profundo riba e condicionnan basico di bida (awa, cuminda, biba) y e patrimonio di e islanan. Pesey tin mester di accion inmediato. E programa “Isleñonan na Timon” ta uni investigador y partnernan social. Asina nan por combina practica di conocemento tecnico, tradicional, y contemporario pa hunto crea strategianan pa adaptacion social sostenibel y incluso pa e retonan climatologico aki.
Na maart 2020, un ekipo di investigador y partner social a viaha pa e 6 islanan den Caribe Hulandes pa organisa seminarionan consultativo. Dia 12 di maart 2020 esaki a tuma lugar na Museo Arqueologico Nacional Aruba (MANA). Investigador y stakeholdernan a discuti e ideanan inicial y planificacion di e programa. E meta principal di e seminarionan tabata pa discuti e retonan di cambionan climatologico cu e islanan di Caribe ta enfrenta. Ademas a delibera riba defini metanan comun pa adaptacion social pa cambionan climatologico. Tambe con pa amplia y fortalece e red di futuro aliadonan y a cuminsa discusionan pa formula preguntanan y acercamento pa formula e proposicion na NOW. Tur e combersacionnan a contribui na e programa final “Isleñonan na Timon”.
Un plataforma academico trans-Atlantico lo fomenta educacion basa riba investigacion di e retonan di clima pa e 6 islanan. Un di e metanan di e programa indica ta pa crea un centro di expertisio regional cu enfoke riba retonan climatologico, unda investigadornan di Caribe por haya trabou. E centro aki lo ser maneha pa e Universidad di St. Maarten, Universidad di Korsou, Universidad di Aruba y e Instituto di Ciencia Caribense Hulandes. E institucionnan menciona a compromete pa traha na e integracion aki. Hunto lo ofrece cursonan den coperacion cu institutonan den region y e resto di Reino Hulandes.
E partnernan involvi ta haya e programa financia hopi beneficioso pa e islanan. Tambe nan ta reconoce cu NWO a percura pa un distribucion husto di e fondonan entre e partnernan den Reino. Nan ta kere cu e colaboracionnan riba e nivel di un plataforma trans-Atlantico sigur lo resulta den implementacionan di e resultadonan di e programa y tambe den educacion local y regional. Nan lo enfoca riba con herencia cultural y e adaptacion social di e isleñonan por contribui pa resolve retonan manera con pa acerca y adapta na cambionan climatologico. Hunto cu historiador, artista, arkeologo, antropologo, ingeniero urbano, agricultor y studiante por cuminsa traha riba un futuro sustenible mirando den y rond di nos mes. Cu planificacion y diseño urbano por yega na mehoracion di calidad di bida, por crea comunidadnan mas habitabel y un impacto positivo riba e medio ambiente. Por considera y crea otro posibilidadnan pa atende retonan climatologico, usando un mescla di sostenibilidad, herencia cultural y conocemento tradicional. E programa aproba ta un invitacion pa amplia nos imaginacion, pa trata e retonan cu e medionan disponibel den Caribe, cu e isleñonan na timon.
Pa pregunta of entrevista cu e investigadornan, por tuma contacto cu Emma de Mooij via [email protected].
