Rycond Santos do Nascimento, Profesor di Bestuursrecht, den combersacion cu 24ora.com a analisa e situacion cu a surgi diahuebs anochi den parlamento di Aruba.
Den un reunion riba Pesca a resulta cu na final a bini cu un mocion di desconfiansa contra minister Marisol Lopez Tromp. Un mocion cu a pasa cu 10 voto na fabor. Regla y leynan ta papia cu den votacion mester tin 10 mas un voto (11) pa acepta algo.
Santos do Nascimento ta un hurista specialista riba Derecho Constitucional, kende a splica cu e prome consulta el a haci tabata cu Constitucion. Esaki ta e documento mas halto den e sistema aki na Aruba.
Prome cu bay riba Reglement van Ordo, mester averigua kico ta para den Constitucion. “Tur cos mester keda den cuadro di nos Constitucion. Articulonan 16 capitulo 3 ta bisa cu Staten no por reuni ni tuma decision sin e mayoria di miembronan cu tin asiento ta presente.” Parlamento tin 21 miembro cu ta nifica cu pa Parlamento tuma un decision mester tin 11 miembro presente y participando.
E acuerdo interno firma na luna di maart pa tene reunion cu menos hende den sala, relaciona cu COVID, despues di a firma na inicio, ta algo cu ta hibabo bek na e Constitucion y Rijkswetten. Por regla hopi cos, pero e no por bay en contra Staatsregeling. Tin palabracionnan cu partidonan ta haci internamente cu esnan cu haya mas voto ta drenta Parlamento prome, of por acorda cu si bandona e partido, mester entrega asiento. Tur esey por palabra, pero na final di dia e Staatsregeling ta e ley supremo.
