Recientemente a funda e ASIS Dutch Caribbean Chapter 304. Como e prome reunion di miembronan, diabierna ultimo a organisa un charla historico den World Trade Center na Corsou. Miembro di Parlamento, Robert Candelaria tabata e orador invita, como ex Alto Inspector di Polis y ex Hefe di Siguridad. El a elabora riba “Public – Private Partnership” como e futuro den promove mas siguridad den nos comunidadnan.
“Mi ta kere cu awor aki tin hopi oportunidadnan cu nos mester studia pa mira con por hala e mundonan aki mas cerca di otro. Con por traha hunto, intercambia informacion, intercambia experiencia y tambe sostene otro. Hecho ta cu esun ta haci’e pa un compania priva y e otro ta haci’e pa su pais, pero na final tur dos ta sirbiendo e mesun meta, cu ta bringa siguridad”, asina Robert Candelaria a duna di conoce despues di su presentacion memey di decenas di miembronan di e organisacion cu apenas a tene su prome reunion cu miembronan.
Mas leu e ex Polis y ex Director di Siguridad a splica cu pa por yega na un meta asina, lo mester crea un cuadro legal na unda ta necesario, pa por regla con ta traha hunto y con ta intercambia informacion y experiencia. “Manera m a yega di bisa den pasado, unda Bo tin mas wowo, mas horea, mas cabes, mas man trahando hunto pa e mesun proposito, sin duda lo Bo logra mas!”.
Di otro banda Robert Candelaria a acepta cu e realidad ta tambe cu nos islanan ta chikito, cu recursonan masha limita, pero no mester laga esey stroba e proceso. “Nos no mester pensa cu nos mannan ta mara. Mas bien mester pensa cu si nos no ta logrando pa sali afor via e sistema tradicional, anto e ora ban pensa outside the box pa maximalisa nos potencial”, segun e miembro di Parlamento di Aruba a bisa na e publico di Corsou.
William Tuben, hefe di e departamento di siguridad di MCB-Bank di Corsou a bisa cu e evento tabata historico, pasobra ta lansamento di ASIS, un organisacion internacional na Corsou. E organisacion riba su mes tin no menos cu 35 mil miembro trahando den e industria di siguridad. Awor a funda un “chapter” pa e islanan Aruba, Corsou y Sint Maarten, cu e proposito pa organisa tur e profesionalnan di siguridad riba nos islanan. E intencion ta pa hunto e miembronan yuda otro, pa profesionalisa e servicio y via un union cu autoridadnan hudicial, subi e nivel di siguridad riba tur e islanan.
Ya caba ASIS Dutch Caribbean ta conta cu no menos di 34 miembro entre e profesionalnan di siguridad na Aruba, Corsou y Sint Maarten. Ta intencion pa sigui crece den miembresia pero tambe den e esfuersonan cu e miembronan lo haci hunto pa garantisa mas siguridad riba e islanan.
A funda ASIS International na aña 1955 como un comunidad mundial di tur esunnan cu ta practica e trabou di siguridad. Pues tur hende cu ta hunga un rol den proteccion di propiedadnan, hende y informacion. Su miembronan ta representa virtualmente tur industria den sector publico y priva, sin conta organisacionnan di tur tamaño. E comunidad ASIS ta transcende tur nivel mundial, for di security guards, na gerencia, na veteranonan den siguridad y sin lubida esunnan cu a sali for di e sector militar y di Polis.
E organisacion ta posee un cantidad di experiencia y conocemento riba e area di siguridad. Nan ta ofrece un cantidad di programanan educacional, publicacionnan y eventonan pa yuda profesionalisa tur miembro, sea ta e hobennan of veteranonan.
