Ultimo dianan aki tin masha discusion riba kendenan ta “First Responders” y kendenan ta “Front Liners”. E discusion a crece despues di un bataya publico entre e sindicato di Enfermeronan (ABV) y di Polis (SPA) relaciona cu pago di salario y beneficionan. Hospital ta para riba nan posicion debi cu nan, mundialmente y na Aruba tambe, ta esunnan cu ta cuida pashentnan infecta, mientras cu Polis ta considera cu nan ta topa pashent y tur otro problema prome.
Un conocedo di e materia a corda nos awe riba e profesionalnan medico, e dokternan y e nursenan profesional na Departamento di Salud Publico (DVG) cu a topa cu no 10 ni 20, sino cu TUR e casonan sospechoso y casonan confirma di Covid-19 na Aruba. Contrario na Hospital cu a atende solamente esunnan cu tabata interna, na DVG nan no tabatin scogencia, nan si a atende cu tur, di cuminsamento te fin.
Na tur e profesionalnan di DVG a test no menos di 2230 persona cu tabatin sintoma di Coronavirus. Di e 2230 personanan aki, un total di 101 a test positivo. Di e 101 casonan positivo, ta solamente 15 pashent a drenta y tabata interna den Hospital. Pues ta interesante pa enfoca riba e grupo di mas o menos 25 profesional di DVG cu a topa como prome cu tur caso sospechoso y despues cu tur caso positivo. Ta nan a test tur e personanan aki y atende cu nan, a sabiendo cu nan ta infecta y cu nan por contagia nan.
Ta un grupo cu a saca cara y demostra nan derecho di existencia. Un rol escencial na momento di crisis den salud publico, den cual esunnan cu ta prepara aña den aña afo pa atende casonan complica, a activa mesora.