Proceso pa legalisa Cannabis medicinal a cuminsa

Homegrown indoor pot plants and leaves

Na momento cu e partidonan MEP, POR y RED a forma e gobierno aki, a firma un acuerdo di gobernacion y Cannabis Medicinal tabata parti di e acuerdo di gobernacion, caminda cu a pone como meta, cu lo explora tur e posibilidadnan y haci realidad tambe e uzo di Cannabis Medicinal, asina Minister Dangui Oduber a indica durante di un conferencia di prensa awe mainta. Gobierno a institui un comision cu a haci diferente estudio, investigacion y diferente tarea den nomber di Gobierno, pa haci legalisa Cannabis Medicinal.

E comision a bin cu consehonan, den e caso aki, Dangui Oduber, como Minister di Salud Publico, a busca conseho di Inspectie der Geneesmiddelen pa atende cu e topico aki.

Esaki ta un topico cu a discuti hopi riba dje diariamente, pero mundialmente. Finalmente a tuma e decision, cu como gobierno, cu nan lo bay legalisa e uzo di Cannabis Medicinal den diferente fase.

E prome fase ta e uzo di CBD Oil, CBD Capsule y CBD Creme. Ta usa CBD na momento cu tin hende cu tin enfermedadnan di diabetes, ta sufri di depresion, ta sufri di stress, epilepsia, artritis. 

CBD Oil tin un nivel di THC hopi abao. E dosis di THC den e CBD ta hopi abao y lo indica esaki como un suplemento. E ta wordo indica como un “voedingsuplement”.

E siguiente paso pa legalisa e uzo di Cannabis Medicinal ta cu ta bay “wijs aan” e Cannabis, cu un nivel di THC hopi mas halto. Ta uza esaki no como un “voedingssuplement”, sino como un remedi. Esaki ta uza na momento cu hendenan ta sufri di cancer. Ta pa motibo cu ta haci uzo di Cannabis Medicinal cu un nivel mas halto di THC, e trabao ta diferente compara cu un CBD oil.

Awor aki tin un concepto di ley cu ta cla caba, pero tin cu adapt’e. E dos leynan cu tin cu adapta pa e uzo di Cannabis Medicinal bira un realidad, ta e landsverordening geneesmiddelen, pa asina por indica e uzo di CBD como un voedingssuplement. E otro ley cu tambe ta den un concepto y cu ta cla caba na Directie Wetgeving & Juridische Zaken, ta e landsverordening verdovende middelen, pa mustra e uzo di Cannabis como remedi.

Tur e dos fasenan aki ta bay cana simultaneamente. E proceso a cuminsa caba y awor aki cu a haci e anuncio aki oficialmente, e cambionan aki lo encamina e proceso.

Gobierno ta convenci cu e proceso aki ta un hopi rapido, pasobra ta trata di leynan cu ta cla caba. Mester a adapta nan pa encamina e proceso, pa asina bay parlamento pa haya aprobacion, pa por legalisa e uzo di Cannabis Medicinal.

E prome fase, ta e CBD Oil. Gobierno tin cu duna un importvergunning, pa asina e importadornan por distribui esaki. Intension ta cu por ta disponibel “over the counter” pa comunidad. Por haya esaki na botica y tiendanan cu ta bende suplemento. E di dos fase ta pa “wijs aan” Cannabis como remedi. Esaki ta bay por medio di un receta di dokter di cas of un specialista.

E Minister a indica cu esey ta e decision cu Gobierno a tuma, cu partidonan MEP, POR y RED a firma un convencio y awo por anuncia oficialmente cu e proceso a cuminsa pa legalisa e uzo di Cannabis Medicinal. E Minister a pone enfasis riba medicinal, pasobra ningun rato no a papia di Cannabis Recreacional, pa no bin confucion den comunidad. Ta haci esaki pasobra a proba cu Cananbis Medicinal tin e resultadonan positivo riba esnan cu ta haci uzo di esaki. 

Esaki sigur ta un paso den e bon direccion pa haci’e disponibel na comunidad, pa asina tin acceso tambe na e Cannabis Medicinal.

Na Hulanda y Merca tin e accesibilidad aki. Y awo cu e paso aki, e Minister ta contento cu Aruba tambe a bay den e direccion aki, pa haci’e disponibel pa tur hende por tin acceso na dje y por haci uzo di dje.