E situacion na Openbare Avondleergangen Aruba (OAA) ta keda status quo. Portanan di EPB Hato a keda cera y e studiantenan cu a bin scol pa cuminsa cu nan lesnan no por a drenta y tin un motibo pa esey.
Di siman pasa caba nan a presenta y despues a wordo manda cas bek. Tur cos tin di haber cu e pagonan di losse uren, cual tin tur hende preocupa.
Ainda scol no a cuminsa na OAA pa culpa di Minister Lampe
Posted by 24ora on Monday, September 9, 2019
Carlos Yedallah a splica cu nan a presenta na scol y a haya e mal noticia cu pavia di Minister Lampe, no tin scol. Supuestamente un docente a bisa cu e minister a keda na un acuerdo cu e lo paga nan normal, pero a kibra e acuerdo y lo paga nan losse uren y e maestronan no kier traha asina.
Ya nan a perde un siman di scol. Awo e siman aki tambe nan ta perde. E cos aki ta un coi kens, segun Yedallah. E studiantenan ta full rabia y nan kier nan placa bek. Ta para ocho ora na trabao pa e mes paga su schoolgeld, pa awo tin problema cu e minister.
E ta sigui conta cu un trahado di administracion a menciona pa tuma contacto cu nan y nan lo laga sa si lo bay tin scol si of no.
Studiantenan kier sigui studia
Yedallah kier studia y e mes ta bin di p’ariba bin te Hato pa haya OAA anochi. Awo tin e sorpresa cu no tin scol awe.
Minister mester scucha
E studiantenan kier studia y e minister no a bin duna cara y papia cu e maestronan. Ta increibel con e minister aki, desde cu el a drenta gobierno, tin tanto problema ta sosode. Mira na San Nicolas cu e muchanan a keda sin scol. Kico nan ta pretende? Cu nan tambe ta keda sin scol? E siman aki tambe ta bay perdi. Asina nan estudio ta bay mas atras y despues nan ta sinta critica dicon e hobennan ta riba caya, den droga etc.
A bin pa studia
E noticia cu un otro studiante, Sendy Ermilus, a haya ta cu no tin scol. E director a bisa cu awe supuestamente tin scol, cu supuestamente a haya mas studiante. Esaki ta loke tin’e mas nervioso, door cu el a sali for di trabao y e noticia cu el a haya ta cu no tin scol.
E mes ta traha mainta y anochi y e ta bay scol. E kier sa kico ta bay pasa awo. E ta hopi preocupa, ya cu e no por a drenta EPI, e kier a purba su suerte den mode & kleding, pero mirando con cos ta bayendo, e ta mira cu e ta bay keda un aña mas sinta na cas.
E studiantenan kier siña pero no tin scol pa nan. Awor aki no por bisa e hobennan nada, pasobra nan mes ta causante di e problema aki, nan ta strobando nan oportunidad pa studia. E gobierno ta manera pone un obstaculo pa nan por studia y ta inhusto.
Docentenan harta
Siman pasa e docentenan a reuni cu e minister y dentro di un siman nan mester a reuni pa notifica nan kico lo bay pasa cu cuestion di losse uren. No tabata tin contesta. Nan ta scucha via Facebook kico e minister ta papia, pero no cu e ta bin directo na nan pa bisa kico ta e decision cu ta bay wordo tuma pa loke ta trata OAA y e situacion di losse uren.
Juancho Rasmijn, un di e docentenan di OAA, a conta cu en berdad dialuna siman pasa a papia cu e minister y a yega na un acuerdo cun’e cu el a duna su palabra cu lo bay traha un aña mas overuren y p’e no ta un problema. A pidie un aña mas y djey cuminsa traha riba e cambionan.
Pero pa nan sorpresa, Rasmijn a haya un mensahe for di e minister diabierna, caminda cu e ta bisa cu ta bay cu overuren te cu 31 di december, cos cu no a ni palabra mes. Entrante 1 di januari 2020 OAA ta wordo independisa y ta bay cay bao di un otro fundacion. E ora ta cuminsa full di nobo bao di un otro sistema y cu losse uren.
A bisa minister cu esey no ta e palabracion. E palabracion tabata cu ta bay un aña mas den e overuren. E ora ey a manda e mensahe aki pa e coleganan pa nan wak kico ta kico y ningun hende mas no a tende mas di e minister.
Durante fin di siman a drenta den contacto cu Ricardo Croes, door cu e ta presidente di comision di enseñansa di parlamento y den un carta di tur e procesonan y a invit’e pa e bin na OAA pa por sigui combersa. Pero tampoco no a haya contesta di dje.
Rasmijn a haya contesta mas laat dialuna for di minister Lampe cu e lo sigui combersa cu e docentenan. A palabra cu lo cuminsa awe, lo a haya rooster diabierna cu a pasa, pero no a haya net nada y nan no ta cla pa start. A bisa cu nan si ta bin scol, pasobra ningun hende no a avisa nan kico ta bay pasa. Ta via Facebook ta tende cu no ta start ainda, of falta algo. Pero ningun hende no ta comunica cu e docentenan. Nan mes no sa unda nan ta para.
Nan ta bay un aña mas of nan ta stop, Rasmijn a splica cu esey ta e decision, cu ta keda na cada colega. Hopi di nan ta disgusta. Nan a custuma cu e directiva anterior, cu prome cu september, tur hende tin rooster y lo start sali mesora. Awor aki a cambia tur cos den un tempo corto di un siman, y nada no ta cla.
Con ta bay haci e ora ey, con nan ta funciona, segun Rasmijn. Ta exigi di e docentenan, pero di parti di dje no ta haya nada. A palabra cu e minister, pero e mes no a cumpli.
