Tin diferente desaroyo andando na WEB, cu si actua, si WEB, den un forma responsabel y tambe den e caso aki, Utilities NV no actua, e situacion ta bira serio financieramente pa WEB Aruba NV.
Ing. Richard Frank, ingeniero na WEB Aruba NV y Presidente di Asociacion di Staff y profesionalnan na e empresa, tabata hunto cu su coleganan, incluyendo secretario y tesorero di e asociacion, pa expresa nan preocupacion.
E ta conta cu nan ta representa riba 75% di staff y profesionalnan di WEB Aruba NV. A saca un comunicado, treciendo na preocupacionnan serio riba e rumbo cu e parti di financiamento di e proyectonan grandi cu ta bin pa WEB a tuma.
Nan tin un stakeholdersmeeting ta canando caba pa basta luna, caminda cu WEB cu hopi orguyo ta presenta su plannan pa futuro, su proyectonan cu ta bin den servicio di pueblo di Aruba.
Sin embargo e ta keda un puzzel cu e financiamento a wordo tuma unilateralmente door di Utilities NV y e cos aki tin mas cu un aña ta coriendo caba. A manda dos carta pa Ing. Richard Eman, kende ta director interino di Utilities, haciendo dos pregunta cla y raspa. Te dia di awe no a haya un contesta riba nan. E prome carta a sali dia 31 di october y e di dos carta a sali dia 7 di november. No a tende nada y e dos preguntanan cu a haci ta al caso. E preguntanan haci cu preocupacionnan tambe di miembronan cu ta bin dilanti. Pero nan no ta laga ningun otro alternativa y a dicidi di haci e preocupacionnan publico. E rumbo cu e ta tumando, si e keda asina aki, lo tin chens cu den januari 2020, por haya cu problemanan financiero serio.
Placa no a yega
Ta papiando di financiamento di varios proyecto grandi. E financiamento ta sumamente cuantioso, di mas o menos 700 pa 800 miyon florin. Richard Frank a menciona cu e afronding di e proyecto no ta asina leu ainda. Ta den full speed cu e proyectonan, uno grandi, caminda cu e ta yega e ora cu e invoicenan a cuminsa drenta y obviamente no ta tuma un genio pa bisa cu si e financiamento no ta in place, tin problema.
Ken ta financia
Tin un relacion largo, segun Frank, riba 10 aña, cu Aruba Investment Bank. A traha mayoria proyecto grandi di WEB, financia pa AIB, cuminsando desde 2006/2007. Tin un relacion estrecho cu AIB. Frank mes a participa den hopi di e proyectonan aki. Semper e relacion tabata transparente. E relacion tabata open y cu bon colaboracion mutuo pa por haci proyectonan exitoso.
Desafortunadamente awor aki a drenta den un hanchi cu tin un silencio hermetico di kico ta parando cu e financiamento. E transparencia no tey segun Frank. Esey ta trece preocupacionnan serio den e asociacion. Mirando kico ta biniendo, e por trece e compania den un situacion financiero hopi precario na cuminsamento di otro banda.
Mas caro cu AIB
Awor aki WEB y Elmar tin un fiansa separa, un di 5.5% di interes y otro di 5.1% di interes. E compania Finance Quest a ofrece un miho interes, hasta di 4.5% pa refinancia e debe di ambos compania y pa haya extra fondo. Pero awor aki no ta logrando ni pa cera e suma y ni tampoco pa wanta nan mes na e interes priminti. Parce cu awor nan kier cambia e condicionnan, cu consecuencia cu gerencia di WEB no kier firma. Tambe ta papiando di pasa e propiedadnan di WEB bou Utilities pa por para garantia pa e fiansa, locual e gerencia actual no kier acorda!
Banco Central a “red flag” e compania nobo
Mientrastanto e compania FQ a haya un fiansa masha grandi na Aeropuerto, otro na FCCA y awor ta cla pa “gana e premio di Lotto” cu e refinanciamento di Utilities NV. Pero dado momento Banco Central a pone “red flag” riba henter e “deal” aki cu a inclui un compania di Corsou aden. Despues a purba via un trustkantoor y un bufete di abogado yega na Prome Minister, pa lanta un compania nobo pa “service” e fiansa na Aruba. Y ora nan ta logrando porfin, ata Ministerio Publico y Hues Comisario a drenta cas y oficina di un di e doñonan di Finance Quest, locual a haci e bandera cora mas grandi ainda!
AIB tin e placa caba!
E profesionalnan di WEB a informa awe cu nan semper a traha bon cu AIB-Bank y riba dje, e banco a presenta un oferta sin compromiso na WEB den cual nan ta sigura di tin henter e suma cla y na un interes favorabel. Asina mes Richard Eman ta nenga di sinta cu nan y ta pusha tur cu tin pa e financiamento pasa cerca su amigonan di Finance Quest, aunke cu nan no tin y no ta yegando na e fondonan necesario.
