Diamars mainta, den careda di 11’or, a drenta informacion cu tin un pelea formal na DIP. Polis a bay mesora na e sitio y na yegada a topa cu un homber.

E tabata esun cu tabatin problema cu personal di DIP. Pero, segun informacion haya, e no tabata su so, pero su tata y otro persona a bay for di e sitio caba na momento cu Polis a yega.

A resulta cu e personanan aki pa algun dia caba ta wordo atendi door di DIP pa motibo di un garashi di drecha auto cu nan tin na nan cas na Primavera. Parce cu a drenta keho na DIP cu e garashi ta molester pa e holonan cu e ta saca, entre otro ora di supla. Hasta tin nan mesun famia a bay DIP pa keha nan. E cos ta mustra problema di famia cu a yega cu e molester aserca.

Personal di DIP a bay atende cu nan na e sitio y ey nan caba cos a bay un poco fastioso. Nan a dicidi di bini DIP pa regla asunto. Parce cu nan a mishi na vehiculo di DIP y kier a causa daño,. Varios unidad di polis a acudi na DIP pa e asistencia.

Nan a papia cu e homber pafo y a tuma tur su declaracion y a scucha su kehonan. E ta sinti cu personal di DIP no ta identifica nan mes ora cu yega na su cas y e no sa kende nan. E no ta sinti cu esey no ta e miho  forma di traha. Sinembargo no ta prome biaha cu personal di DIP ta bay eynan pa atende cu e famia encuanto problemanan cu e garashi ta forma. Polis a bise cu miho cos e haci ta papia cu e Minister pa haya permiso pa loke e ta haciendo cu e garashi.

Personal di DIP tambe a sali papia cu Polis y a mustra e spiel di auto cu a haya daño of cu a trata di causa daño na dje..

Tin diferencia di opinion entre loke e dos partidonan ta papia. Polis a bisa e persona cu ta traha na e garashi cu su tata pa bandona e sitio y pa no bin molestia mas na e sitio. Pa evita problema sino lo tuma otro accion. Pa actuacion agresivo bo por bay cera facilmente.

Comments

comments