E secretario di sindicato PWC, Alex Molina, a informa di loke a pasa na Corsou cu Girobank a dicidi di vries mayoria di placa di su clientenan. Apesar cu Girobank a haci daño na henter pais un di e partinan grandi ta cu e trahadonan di refineria Isla, su cen ta eyden.
No como individual, sino placa di e refineria Isla ta den Girobank. Si vries’e, nan no por cumpli ni cu e trahadonan, ni cu e otro partinan, entre otro contratistanan cu ta come tambe for di e bolo cu PDVSA ta brinda via Isla.
Den e cuadro ey tin cu splica con tin cu haya informacion, con ta bay atende. Corsou na e momentonan aki ta den un incertidumbre cu sigur ta toca e trahadonan di Isla hopi pisa, pero tambe ta toca un gran mayoria.
Decision final
Molina a comenta cu a manda traha tur trahado di Isla. Esnan cu ta laborando tambe y sea cu ta miembro of no, tur trahado a bin pa haya informacion di loke a bin dilanti bisando y tambe ki posicion nan ta tuma na momento cu nan tende cu nan no tin un claridad cu nan pago di fin di luna aki, hunto cu loke tin pa haya tambe den 2019 cu ta planea pa haya netamente fin di luna, hunto cu e cen normal.
Ta nifica cu ta pone un panico entre e trahadonan cu nan no sa kico ta bay pasa. Na e momentonan aki ningun mandatario no a sali y bisa nada.
Reunion entre gobierno y refineria
Molina a comenta cu esey tambe nan ta na altura di dje. Pero a base di kico. Ya ta mas cu 24 ora y ningun mandatario a sali. A bin cu un rueda di prensa bisa cu nan lo purba di cumpli cu 93% di e clientenan. Awo e 7% por ta ta produci mas tanto, sigur na cliente den e 93%. Si coy di refineria so, tin 910 trahado, sin conta e otro companianan cu tambe ta den e parti ey.
Contratistanan
Refineria tin cu paga e contratistanan y e cen di refineria ta den Girobank. Den caso di e trahadonan, refineria ta paga nan. Molina mes tin un otro banco, pero e placa ta keda pega, pasobra e placa di refineria ta pasa di Girobank pa e otro banconan. Esaki sigur tin e trahadonan preocupa.
