Na e dam di Rooi Afo ta yega diferente cunukero, specialmente esunnan di Paradera y area, pa saca e awa pa nan plantacion. Pa varios siman tin problema tumando luga y consecuentemente e cunukeronan di Paradera y area a bini hunto pa trece nan preocupacion dilanti.
Abby Croes, kende ta un cunukero, a splica cu compania ta keda saca awa y esaki ta algo no desea. Nan a bin ripara cu den e ultimo dos siman tur dia un compania ta chica awa 24/7. Nan a hasta presenta na e departamento di agricultura, esta Santa Rosa, pa trece nan preocupacion. E contesta ricibi dje instancia, ta cu pa binti aña e compania ta haciendo esey y con awo nan a bin ripara.
E tubo cu tin eynan ta bay dam y no ta mira cu tin buraco. Pero awo cu awa a baha, por mira cu tin un buraco. Pa motibo cu ta chica awa 24/7 esey a trece preocupacion n’e cunukeronan. El a splica cu na momento awa seca, ta dal e porta cera. Esey ta pone nan cu ta yega eynan den nan pickup cu tanki no por coy awa, pero e compania si ta bay sigui chica ya cu nan tubo ta memey dje dam. Santa Rosa a informa Croes, cu nan no tin nada di bisa n’e dam, pero si ta cera e porta dia di maña ora esaki cuminsa seca. Motibo cu ta haci esey, no ta conoci pa su persona.
Croes a splica cu el a yama Santa Rosa siman pasa riba e situacion y ayera tambe. Aki ta unda cu e telefonista a bisa nan cu e directora a puntra dicon pa binti aña largo nan no a ripara cu e compania ta chicando awa. E cunukeronan kier sa cerca ken nan mester bay si e departamento di agricultura di gobierno no ta proteha nan. Nan no tin un plantacion y loke nan ta produci sea ta pa nan mes y famia, y si tin un tiki di mas, nan por bende algo. Nan ta pidi pa yega na un solucion.
Pa cobertura mas amplio, lesa e edicion di TREMPAN mañan.