Pro juventud savannah su grupo di 60+ liber liber Di bishita na Banco Central Aruba

Diahuebs, 18 di juli 2019, Pro Juventud Savannah 60+ Liber Liber, tabata di bishita na Banco Central Aruba. E grupo 60+ Liber Liber, cu ta consisti di 40 persona a bishita Banco Central Aruba pa haya un splicacion di Aruba su placa nobo.

E grupo a wordo ricibi tremendamente bon, cu un presentacion sublime y un splicacion bon cla y detaya cu tur miembro di grupo 60+ Liber liber a encanta masha y a comprende hopi bon. Prome e grupo di trabao di e proyecto “Bon Bini” di Banco Central Aruba a laga tur hende mira un video masha bunita cu ta mustra a base di ki vision, idea, ingredientenan di nos cultura, flora y fauna a traha e placa Arubiano nobo. Ta recomendabel pa tur hende mire.

Despues cada miembro di grupo a haya un placa di papel nobo (sea un 10, 25, 50, 100 y 200), un lupe y un aparato cu luz ultraviolete. Durante e splicacion duna, cada miembro por a usa e placa di papel pa observa, reconoce, mira, lesa, fula y experiencia cada detaye riba e placanan nobo di papel. Y bo ta tende waw, ohh, bunita!!

A splica e trabou cu e team a desplega durante 7 aña largo, na unda a tene cuenta cu e ingredientenan cultural di Aruba, cu e grandura di e placanan di papel, con ta pone e diseño riba e placa, con a envolvi artistanan local,  cu mester a tene cuenta cu e seguridad pa no falsificacion,  cu e escogencia di e material pa usa pa e placanan, e pruebanan cu a keda haci cu e material, a scucha e informacion y experiencia di otro paisnan, p’asina a yega na e producto final, esta Aruba su placanan di papel nobo.

Na final tur miembro di Pro Juventud Savannah 60+ Liber Liber a haya un moneda como recuerdo.

Pro Juventud Savannah grupo 60+ Liber Liber ta gradici Presidente señora Jane Semeleer y e grupo di trabou dinamico y motiva “Bon Bini” di Banco Central Aruba pa e tremendo mainta aki y nos ta reconoce boso excelente trabou. Masha Masha Danki.

Grupo 60+ Liber Liber di Pro Juventud Savannah a sinti nan mes sumamente orguyoso cu Aruba su placanan di papel nobo. Cu Aruba ricibi su placanan di papel nobo cu hopi orguyo nacional.