Prins cu Pancho: Duna tur trahado bonus di Carnaval den salario di januari

Ta for di 9:30am caba tur e monarcanan di carnaval 65 a topa na Linear Park. Den autonan clasico y Mustang a sali compaña pa motorcyclenan Harley Davidson pa Stadhuis pa toma di mando for di Gobierno di Aruba. Ta un tradicion di hopi aña caba, den cual e Prins cu Pancho ta tuma “mando” di nos pais durante e ultimo simannan di carnaval.

Pa esey nan ta presenta un mandato, den cual ta “adapta” leynan y maneho di Gobierno pa e temporada. Claro cu e forma chistoso aki tur aña ta hala masha atencion. Prome Minister na final a entrega yabi di nos pais na e Prins y Pancho grandi di Carnaval 65.

Na yegada di e Reinanan y Prins cu Panchonan, a anuncia cada un na nan nomber pa asina nan a baha for di auto y riba tapijt cora a cana yega e evento, mientras cu Minister Presidente Evelyn Wever-Croes tabata sperando riba nan como anfrition di e ceremonia tradicional.

E evento a start cu presentacion di e Rey di Tumberito Hubenil 2019, esta Xennon Daal cu su tumba “Mi tey carga Carnaval”. A sigui cu palabranan di bonbini di e Presidente di SMAC, Shannon Henriquez. Su tras a continua cu lesamento di e decreto di Prins y pancho grandi di Aruba su Carnaval, den persona di Prins “Bon”, Junior Rafine y Pancho “Malo”, Micheal Quant.

Prome Minister di Aruba, mr. Evelyn Wever-Croes a tira su discurso den cual “oficialmente” e ta traspasa su poder na e Prins y Pancho di Carnaval. Durante e entrega di mando el a haci un apelacion special na e Monarcanan di Carnaval pa nan tene cuenta cu specialmente e muchanan y pa tur hende goza carnaval den forma sano.

Mientras cu tur atencion ta riba e Prins y Pancho grandi, no por keda sin menciona y reconoce presencia y sin lubida e rol cu e otro dos prins y panchonan ta hunga den e proceso pa “goberna” nos pais den e dianan cu ta sigui te cu kimamento di Rey Momo. Nan ta e Prins y pancho infantil, Prins ‘Antes’ Joshmar De Cuba y Pancho’ Awo’ Jaymar de Cuba, mientras cu den categoria hubenil nos tin Prins ‘Mal’ Dwayne Dabian y Pancho ‘Tempo’ Obi Tromp.

E evento a termina cu un oracion pa siman di carnaval di mucha presenta pa Reina di Carnaval 65, Jeannisa Maduro sigui pa presentacion di Roadmarch Queen Hubenil, Gzandra Weever. 

E monarcanan di Carnaval na final di e evento a compaña Prome Minister Evelyn Wever Croes pa su oficina pa ricibi un “pin” di Aruba como reconocimento pa nan trbaou den Carnaval 65.