SIMAR tabata presente na Prins Bernhard School mustrando nan mal contento hunto cu e docentenan, alumnonan y mayornan. Dia 3 di juli ta e ultimo dia di e scol unda cu nan mester entrega e yabi pero eigenlijk scol ta cera dia 10 juli proximo.
Den e ultimo simannan aki a tende diferente motibo pakico e scol tin di cera manera resultado ta malo, e no ta un scol, docentenan tin otro trabou, cabesante ta di acuerdo pa cera e scol. Tambe ta yama e cabesante di scol y intimid’e, asina Josephine Albertus, presidente di SIMAR a bisa.
Cabesante di e scol mes a traha un carta bisando cu e ponencianan no ta cuadra. SIMAR a sigui bisa cu e cabesante no a sinta cu Minister di Enseñansa pa trata ceramento di scol. E mandatario a bisa cu e scol no por sigui otro aña, pasobra e docentenan di Prins Bernhard School tin trabou otro caminda. Tur esaki no ta berdad, pasobra a bisa nan cu mester bay solicita.
Loke e scol tin como garantia ta e carta di Minister President di dia 16 juni, bisando cu Prins Bernhard School ta keda habri pa aña escolar 2020-2021. Cu e carta aki si nan tin garantia cu otro aña e docentenan tin trabou. Ta puntra unda e leerplicht a keda pasobra dia 10 juli scol ta cera y no dia 3 juli. E muchanan tin derecho di haya enseñansa y docentenan ta bisa cu nan tin deber di duna muchanan enseñansa.
