Prins Bernhard Cultuurfonds Ta Yuda Symphony Festival cu 25 Mil Florin

2

Apenas un siman prome cu cu su Concierto Inaugural di 2019, Nuevo Mundo Foundation a haya e bon noticia cu Prins Bernhard Cultuurfonds Caraïbisch Gebied (PBCCG) lo contribui 25 mil florin pa yuda cubri e gastonan di hospedahe di mas di 70 studiante cu ta yega Aruba awe, dia 15 di Juli, pa tuma parti den e 2019 Aruba Symphony Festival.

Como cu e aña aki e Festival ta bay ricibi mas studiante, y ta bay dura mas dia cu tur otro aña, e gastonan di hospedahe ta mas grandi cu nunca. Si abo kier haci un donacion na Aruba Symphony Festival, nos cuenta bancario ta na Aruba Bank y e number ta 6011080190.

E studiantenan ta bin di cerca y di leu, di 15 diferente pais. Hopi a bin un of dos biaha caba, mayoria ta bin pa di prome bes. Entre esnan cu ta bolbe ta Daniela Perez, e violinista Venezolano cu aña pasa, na edad di apenas 13 aña a gana e competencia di studiantenan. Entre e studiantenan cu ta bin pa prome biaha, tin un chellista cu ta bin di Boyaca, Colombia. E yoncuman aki tin nada mas cu 12 aña y ta toca su cello desde cu e tabatin 5 aña. Aki e lo haya les di maestronan di nivel mundial manera Horacio Contreras y Adam Liu.

Nuevo Mundo Foundation ta lamenta cu a pesar di yamadanan cu nan a haci na musiconan Arubiano cu oferta di lesnan gratis,
solamente un musico a responde.

E concerto inaugural lo habri cu un presentacion di un programa prepara pa nos soprano stima Tica Giel kende lo dirigi e Coro Hubenil di Sta. Ana School di Noord y e coro femenino “Den Harmonia”. Nan lo canta canticanan tradicional di Aruba. Tica mes lo canta algun cantica solo y cu acompañamento di e coronan combina. Un programa bunita cu nos Arubianonan y visitantenan lo gusta.

E programa inaugural lo continua cu e pianista mundialmente conoci, Edith Peña ken lo toca obranan alegre di Mozart, Schubert y Brahms acompaña pa Randolph Kelly (violista) y Adam Liu (cellista) di Pittsburgh Symphony Orchestra, ganador di un Grammy aña pasa. Edith Peña a wordo nombra pa un “Best Classical CD Latin Grammy” na 2016. Luna pasa el a duna cociertonan na diferente stad di Zuid Afrika.

E concierto Inaugural di Aruba Symphony Festival 2019 ta tuma lugar diaranson 17 di juli den Cas di Cultura cuminsando 8 pm. Lo tin un sorpresa grandi cu no ta riba e programa! Tiketenan di entrada ta costa 35 florin pa adulto, 20 florin pa hobennan te cu 18 aña y nan ta obtenibel na tur boekhandel, na Cas di Cultura y na Aruba Vision Center. Nos ta sugeri bo cumpra bo tiket delanta pa bo no tira den bashi na entrada.