Prijs di stampia ta subi na Hulanda

Prijsnan di stampia lo subi un biaha mas. Esey ta necesario pasobra post mester por keda pagabel pero solvabel, segun Resi Becker, director di Mail Nederland di PostNL. Entrante Januari 2019, e costo di un stampia normal lo bira 0,87 cu ta un aumento di 4,8 porciento contrario na e tarifa basico actual di 0,83. Tambe pa manda un “aangetekende brief”, lo bira mas caro: 8,45 cu ta 5 cen mas cu awo. E tarifa pa paketenan pa manda den Hulanda mes, lo keda 6,95.

Segun Resi Becker, director Mail Nederland, e aumento gradual di prijsnan di stampia ta necesario pa haci cu post pa tur hende na Hulanda ta keda pagabel, accesibel y confiabel. E aumento di prijs por tabata mas halto pasobra Autoriteit Consumenten en Markt (ACM), a duna PostNL aprobacion pa subi prijsnan cu 14,2 porciento. Pero no a haci uso di esaki.

Den e ultimo 10 añanan e prijs di stampianan a redobla. Costo di un stampia normal ainda na 2008 tabata 44 cen, entrante Januari 2019, esaki lo bira 87 cen.

E tarea di E-commerce

Apesar di e caida di mercado di post, cu ta contrae cerca di un 10 porciento anual, e facturacion di PostNL den e di tres trimester a aumenta na 638 miyon. Esey ta 8 miyon mas cu den e mesun periodo di aña pasa. E servicio di e-commerce ta hunga un papel importante den esaki. E compania awo ta obtene 49 porciento di e facturacion total di e-commerce. E cantidad di paketenan manda tambe a subi cu 20 porciento contrario na e aña anterior.

Spaarmento di costo tambe a hunga un rol den e ganashi di PostNL. E aña aki ya caba a spaar 34 miyon na costo. Aña pasa, ACM a dicidi cu e red di PostNL mester habri su post comercial pa competidornan. Esey lo traha luga pa un costo di 50 pa 70 miyon di euro pa aña, pero e Colegio di Apelacion di Comercio y Industria (CBp) a pone un liña atrabes di e acuerdo aki na September. Como resultado, e obligacionnan di PostNL na otro transportadornan postal a expira y e impacto di e decision anterior di ACM ta solamente di 40 pa 45 miyon di euro.

 

Tres centro di sorteamento di pakete nobo

Anteriormente, e compania a premira un ganashi di entre 160 y 190 euro. Esaki parce di tabata tin exito, segun Hema Verhagen, CEO di PostNL. E ta satisfecho cu e resultadonan den e di tres trimester y a subraya cu nan a habri tres centro mas di reparticion net prome cu e temporada halto.

Dialuna el a anuncia cu na Amsterdam lo habri un luga nobo caminda diariamente por procesa entre 70 mil y 110 mil pakete y ta percura pa 400 cupo di trabou. Esaki lo bira e di 21 centro di sorteo di pakete na Hulanda.