Panaderonan no por sigui carga e peso mas di e gastonan pa traha pan na prijs barata pa pueblo. Entrante 1 di juli 2019 lo aumenta prijs di loke ta considera “Kipashi”. E prijs di Kipashi blanco ta regula pa Gobierno pero awendia casi no por papia di pan blanco mas.
Tempo cu e Minister di Asuntonan Economico di AVP a stroba aumento di prijs di pan blanco, e panaderonan a hinca un tiki hariña bruin aden y asina elimina e pan blanco 100% for di mercado. Caso no ta sinti e mix pero e no ta 100% pan blanco.
Awe un kipashi normal ta costa 4,10 florin. E intencion ta pa hisa esaki cu 20 cen pa kipashi y cu ta esun mas bendi tambe pa panaderianan. Parce kier a trata pa hinca e pan den canasta basico pero Gobierno no a duna oido. Panaderonan a expresa nan mes caba cerca Economische Zaken cu a reconoce e aumentonan cu awe ta hustifica aumento di Kipashi.
E cambionan fiscal di Gobierno a pone basta peso riba e Panaderianan y pesey nan no por sigui absorba of traha pan na mesun prijs. Sea ta kita trahado of ta hisa prijs. Pan ta algo cu diariamente ta wordo bendi na Aruba. Practicamente den tur cas tin pan como parti di nan cuminda. Tin negoshi cu awe ta bende Kipashi na 4,50 Florin pa un.
Oficialmente panaderianan ta bende na negoshi pa yega na un prijs di 4,10 Florin na cliente. Hariña tambe awendia ta mas caro ainda pa importa. Tur e factornan y mas ta causa e aumento. Asociacion di Panaderonan a reuni caba y e aumento di prijs ta mas of menos calcula caba. Nos redaccion a papia cu esunnan cu ta den e asociacion y pesey awe ta notifica comunidad di e cambio of aumento cu ta na caminda pa e pan Kipashi entre otro.
