Manera cu nos a informa desde diabierna caba, ta reinando un tension grandi den coalicion MEP-POR-RED relaciona cu e discusion riba legalisacion di marihuana (medicinal) na Aruba y pa disputa cu Marisol Lopez pa su orario di trabou. Diabierna Lopez-Tromp no a presenta na Parlamento y ora Hendrik Tevreden a aclaria posicion di MEP riba legalisacion di droga, mesora Ricardo Croes a explota den Parlamento y a bandona sala. Mesora coalicion di 12 miembro a bira 10 miembro, no suficiente pa un reunion, pa cual a pospone e reunion mesora.
Henter fin di siman tabatin deliberacionnan pa mira si por “lijm” e coalicion na otro pa por continua. Tin algun asunto urgente pa atende, entre otro Presupuesto 2019 cu mester pasa prome cu fin di aña, e cambio di ley di LAFT pa e acuerdo cu CAFT y sin lubida e reforma fiscal pa Departamento di Impuesto Aruba. Aunke cu e ta mustra casi imposibel pa pasa den poco tempo, toch Gobierno ta forsando pa keda cla.
Un di e retonan den caminda ta vakantie di Parlamentario Daphne Lejuez, kende desde simannan atras a anuncia cu e ta bay cu vakantie awe pa Hulanda hunto cu su famia.
E no a presenta awe Mainta na Parlamento, pa cual a manda yam’e pa reunion por a cuminsa. Pero, for di 1:45pm cu e reunion mester a continua, ainda ta wanta pasobra no tin 11 Parlamentario den sala di Parlamento. Manera ta conoci, 12 asiento kita Ricardo Croes y Daphne Lejuez ta bira 10 asiento cu no ta suficiente pa por reuni ni pasa ningun ley.
Ta pa e tipo di situacionnan asina hopi hende ta prefera un Gobierno di un solo partido, den bes di coalicion den cual e mayoria casi Semper ta depende of ta na merced di e minoria. Pa via di un discusion riba legalisacion di Cannabis, awor henter Presupuesto di nos pais ta secuestra den Parlamento.
Y aunke no a baha cu reces ainda, Parlamentario Lejuez ta demostra cu su interes personal ta pisa mas cu di su partido, su fraccion y su pais completo!
