Presion politico riba Ministerio Publico ta preocupante

6335

E forma con a persigui un hoben profesional inocente
 y encarcel‘e algun dia riba denuncia y presion di gobierno
 riba Ministerio Publico, Landsrecherche y Polis a lanta hopi mas 
duda den imparcialidad di e institutonan aki. Esaki ta locual ta sinti den comunidad.

Den fin di siman a bira conoci cu Ministerio Publico a yega na e conclusion cu nan no tin prueba contra periodista Marko Espinoza. E mesun Ministerio Publico y Landsrecherche cu a drenta cas di su mayornan, confisca su cosnan, detene Marko Espinoza seis dia largo y a menasa e famia cu nan lo wordo deporta si no admiti culpabilidad. Esaki ta un ehempel mas di un forma inaceptabel cu ta utilisa pa yega na prueba contra hende inocente, pa asina cumpli cu e representante di gobierno cu a entrega e keho. 

Despues di e caso di Paul Croes (AVP) y su impacto politico y tur acusacionnan cu ta circula rond di Ministernan actual di Gabinete Wever-Croes, incluso algun parlamentario cu ta sostene e coalicion, hopi a spera cu OM lo a mustra imparcialidad y dirigi e mesun fervor na e otro banda politico. 

Pero di biaha cu e gobierno di Wever Croes a sinta por a mira cu Ministerio Publico y Landsrecherce a cuminsa bira instrumento politico di Gabinete Wever Croes. Un cantidad di caso di persecucion y retiro tabata na orden di dia desde e prome oranan di Gabinete Wever-Croes. Mas preocupante e situacion a bira ora cu Landrecherche y Ministerio Publico tambe a cuminsa presta nan mes pa presion politico di gobernantenan y parlamentarionan cu ta sostene gobierno.

Ni gobernantenan y tampoco parlamentarionan ta sconde e cantidad di vez cu nan ta dirigi nan mes na Ministerio Publico pa pone presion pa persigui oponentenan politico, sea periodista of politico. Un situacion cu tin nos comunidad hopi preocupa. 

E fenomeno aki di utilisa e arma di Ministerio Publico contra oponentenan politico a bira un patronchi reconocibel y peligroso durante cada gobernacion di e signatura di MEP. Semper esaki ta termina cu un crisis di confianza grandi den Ministerio Publico y persecusion di hopi inocente. 

Espantoso pa mira cu un vez mas historia ta ripiti. Parlamentarionan di gobierno y gobernantenan ta entrega denuncia contra oponentenan politico y ta pone presion riba Ministerio Publico y Landrecherche cu ta bira complice di persecusion politico. Un situacion alarmante pa nos estado di derecho.