Ibisa ta bezig ya for di algun siman caba cu midimento di presion. Pero awo kier enfoca mas riba personanan cu tin presion halto caba. Si kita afo cu e personanan cu no tin presion halto, pa nan sigui cu e campaña. Nos tur sa cu e malesa di presion halto ta silencioso y no ta causa ningun tipo di sintoma.
Stephen Croes ta dokter na Ibisa, trahando pa e departamento di salud y ta splica cu tin hende ta bis’e cu nan no ta sinti nada. Hustamente esey ta e creencia cu kier kibra, pa pueblo tambe ta conciente cu apesa cu no ta sinti nada, bo por ta andando cu e malesa aki. Invitacion pa sigui cu e parti di screening ta hopi importante.
Si bo ta un persona cu presion halto, hopi di e pashentnan cu dr. Croes ta topa, tin di haber cu nan no ta tuma nan remedi y nan mester haci esaki.
Ta personanan cu ta bisa cu nan ta sinti nan mes bon, net ora cu su presion ta haltisimo, sin sinti nada.
Dr. Croes a enfoca riba e importancia cu si bo ta sufri di presion, sigui cu tratamento medico. Si bo kier cambia e tratamento, por hacie pero cu autorisacion di e dokter di cas. No ta cu abo como pashent tin e decision tampoco. Ta bon pa bo consulta cu bo dokter pa asina e splicabo e motibonan dicon bo tin cu sigui cu e tratamento.
Kico ta e remedi ideal
Tin dos tipo di remedi, segun dr. Croes. Tin esunnan cu ta conoci comercialmente y tin algun cu tin e creencia cu nan ta remedinan tiki mas barata. Evidencianan ta mustra cu lo por tin un chens chikito di diferencia entre remedinan comercial y esunnan generico. Pero na final pa e remedi generico ta riba mercado, e mester tin e mesun structura kimico cu esun comercial.
Cu otro palabra, ta haya e mesun componente den un forma mas barata. No cu e remedi ta di menos of di pio calidad compara cu uno comercial. Aunke e creencia tey cu e genericonan no ta sirbi. Nan ta sirbi, segun dr. Croes. E mester wordo tuma y mester cumpli manera dokter perscribi esaki. Si ta pashentnan cu ta bebe manera cu nan kier, e ta constata otro. Pero tin cu puntra bo mes, si ta bebe e remedinan manera mester ta, ta e pregunta grandi.
Consenshi
Una bes cu bo wordo diagnostica cu presion halto y bo ta bebiendo remedi, no ta nifica cu bo mester stop di controla bo presion. Aki ta un fout grandi, pasobra un biaha mas, manera tur malesa, nan ta progresivo pasobra si bo no cumpli cu tur e remedi cu wordo prescribi. Bo por ta un pashent cu ta bebiendo e pildonan, pero toch no ta yega e meta cu kier, pa e presion ta bao di control.
E pashentnan aki, bebiendo nan remedinan, ta conseha nan toch si por regularmente check e presion. Durante e campaña aki ta evidencia cu tin hopi hende, apesar cu hende ta bebe nan remedi, toch keto bay tin presion halto. Esaki tin di haber, e progresion di e malesa. Den e casonan aki ta conseha pa bay dokter di cas pa splik’e cu apesar cu ta bebiendo remedinan y ta sigui cu e recomendacionnan, toch tin presion halto. Den e siguiente paso ta, cu abo y e dokter tin cu evalua e necesidad di adapta e terapia cu ta hayando. Por ta esaki por crea un confusion tambe cu nan ta crea imagen cu e remedi no ta traha. Atrobe, malesa ta progresa y e terapia mester wordo adapta segun e numbernan cu tin na e momento ey.
Tambe dr. Croes a enfoca riba esnan cu ta sufri di e malesa aki, lo ta ideal cu abo y bo dokter di cas por controla e riñonnan con nan ta trahando. Segun guianan Hulandes, por wordo haci sikiera un biaha pa aña, si bo ta un pashent cu ta cumpli. Tambe dr. Croes a enfoca riba e parti cu ta di importancia, cual ta e parti di nutricion y parti di actividad fisico.
No ta nifica cu e persona tin presion halto, ta bebe remedinan, pero ta laga e banda di actividad fisico y nutricion.
Pero pa combati e malesa di presion halto mester wak’e di un forma integral. No ta e remedinan so, apart di esey tin cu cambia e estilo di bida.
E parti di e dieta mester recorda un y tur cu ta un dieta abao den salo. Si por, abao den vet y tambe mester tin hopi potasium. Hidratacion ta importante, e parti di stress management ta importante. Y si bo ta un persona cu ta huma, stop cu esaki. Si e persona ta bebe, purba limita alcohol of kite por completo.
