Presidente Duque a decreta estado di emergencia na Colombia

685

Presidente Ivan Duque a declara estado di emergencia pa henter e pais. A haci e anuncio aki diamars anochi cu e meta pa enfrenta e emergencia di COVID-19.

“Nos estado a bin ta trahando 24 ora pa dia, 7 dia pa siman, pa compronde y enfrenta e pandemia. Nos ta den e fase di contencion. Na e momentonan aki e virus ta presente na 160 pais y a contagia mas di 194.000 persona na henter mundo. Te na e momentonan aki, na nos pais a logra sigui e cadena di contagio, y identifica. Nos mester sigui traha hopi lihe, pasa pa paso, y cu determinacion total. E ta e reto di mas grandi di humanidad den temponan recien,” e mandatario a bisa.

Duque a bisa cu e reto ta exigi saca lo miho di tur e colombianonan. “Uni nos por sali dilanti. No ta e panico mester dicta nos accionnan. Nos ta tuma decisionnan dificil, pero no iresponsabel,” el a bisa.

“En bista di e condicionnan excepcional cu e pais ta enfrenta, como Presidente di e pais y hunto cu tur e ministernan nos a decreta estado di emergencia, manera ta para den articulo 215 di nos Constitucion. Esaki ta bay compaña pa un serie di medida economico.”

E prome medida di emergencia, e presidente a bisa, ta enfoca pa protege e adultonan grandi, cu ta e victimanan mas afecta pa coronavirus.

“Pa e motibo ey nos a ordena aislamento preventivo obligatorio di e personanan di mas cu 70 aña na henter e pais, for di 20 di maart te cu 31 di mei, cu excepcion cu ora nan mester bay dokter of acudi na un servicio financiero,” Duque a bisa.
Diahuebs mainta, presidente Duque a schors trafico aereo y terestre, manera restriccion di yegada di stranheronan pa 30 dia.

Comments

comments