Den e dianan aki tin diferente desaroyo politico tumando luga y un di e temanan tin biaha cu ta sinti cu mester tuma luga, ta e asunto di legalisacion di marihuana.
Presidente di sindicato di Polis, Jose Dirksz, a probecha di comenta como polis, no solamente como presidente, ta pidi pueblo pa por fabor, no acepta e legalisacion di marihuana.
Dicon no?
E consecuencia social lo ta demasiado drastico. Nan por dun’e un nomber bunita, manera Cannabis Medicinal. Marihuana e ta keda y marihuana e ta. Ken no a huma mas marihuana cu Bob Marley. Toch el a muri di cancer na un edad jong.
Segun Dirksz, por dun’e un nomber bunita, pero e ta keda un problema una bes cu legalis’e. Como polis, Dirksz ta keda accentua riba esaki. Ta bay asistencia na cas di hende y ora cu tin un adicto den famia, ta full e famia ta sufri. No ta un hende so. E mamanan ta yora pasobra nan ta mira con nan yiu ta bay perdi. Cada hende cu a traha e trabao di polis sa esey.
Den Parlamento tin tres polis y nan sa di kico e ta papiando, Dirksz a bisa. Por busca un manera pa haci nechi, pero Aruba no ta cla p’e. E problema social ta demasiado grandi.
Motibo pakico no por legalisa
Tur adicto ambulante sin excepcion a cuminsa cu marihuana, djey nan a bay pa cocaina. Despues di cocaina nan a bay pa base y despues di esey, tur hende sa kico ta bin despues.
Tambe, algo cu hopi hende ta lubida, e consecuencia di humamento di marihuana a largo plazo, ta causa schizofrenia. Un colega di nan mes a wordo mata door di un persona cu a sufri di schizofrenia. Cuanto prueba mas pueblo di Aruba kier pa sa cu e cos aki no ta bon pa e isla aki. “Con bo ta sinti ora bo ta hiba bo yiu scol y hendenan cu ta sufri di schizofrenia ta cana rond di scol di e yiu. Esey ta e Aruba cu nos kier? Nos mester ta mas serio.”
E por sinti un tiki den esfera politico pero polis mester keda para riba nan standpunt. Nan deber ta pa proteha e pueblo aki.
Por ultimo Dirksz ta pidi pueblo encarecidamente, pa no acepta e legalisacion di marihuana, pasobra e consecuencia social lo ta demasiado drastico pa e isla aki.
Dirksz a lesa un salmo di Bijbel: 2 Corintio capitulo 11: Diabel ta bisti na angel ora cu e tin cu comete su maldadnan.
