Comision Preserva Malmok ta di acuerdo y ta respalda e accion di habitante di Noord/West Punt cu e peticion andando pa limita permisonan cu ta duna pa busnan di placer y ATV/UTV. E barionan a mira un aumento halto den trafico y desordo den e ultimo 2 añanan. E calidad di bida den barionan ta bahando door di tanto trafico comercial.
Cierto habitante, specialmente riba L.G. Smith Blvd, Malmokweg y Arashi, no solamente mester “deal” cu tantisimo tour bus, party bus di dia y anochi, pero tambe desordo enorme di UTV’s. Comision Preserva Malmok tin entendi cu a redobla e cantidad di permiso y cantidad pa UTV den e ultimo 2 añanan. Tin mas di 400 di e vehiculonan aki ‘riba caya.
Di parti di Preserva Malmok lo kier mira limitacion riba permisonan na tour bus y un stop pa mas permiso pa UTV, cambio di ley pa reenforsa pa evita tanto sonido den barionan residencial.
Habitantenan di e area di Malmok ta compronde cu tour operators kier mustra con bunita e bario ta, pero ta pidi pa mustra respet pa e residentenan y naturalesa. Kiermen, no core duro, no core riba baranca y beach. No tira sushi, no uza laman pa bay baño, no stroba pisca y parha.
Ta importante tambe pa tour operators y companianan cu ta huur e vehiculonan aki pa informa nan cliente cu ta ILEGAL pa core riba beach, duinen, baranca, etc. Nan mester ordena nan pa core trankil cu nan mesun siguridad den mente. Hopi accidente a pasa caba incluso dos basta serio na Malmok mes.
E destruccion di naturalesa (di neishi di parha, lagadishi y tortuga) y e santo cu ta bula bay na parti patras di Light House (eigenlijk full Noordkust!) cu ta yega te Malmok. Tin un par di compania cu a cuminsa respeta e bario y naturalesa, pa cual e bisiñanan ta gradici nan pa compronde nan deseo pa trankilidad y privacidad.
“Nos dushi baranca Aruba no ta pa turista so! Nos mester por biba un bida trankil y ameno pa por sirbi nos bishitantenan”, asina e relato di e organisacion ta termina bisando.
