Den un auditorium completamente yen a tuma luga e culminacion di un investigacion di mas di 12 aña cu enfoke riba kico e musica di Calypso ta encera. Docente / investigado na Instituto Pedagogico Arubano ( IPA ), investigado riba tereno di musica di Calypso como tambe cultura di Caribe y Latino America poniendo asina un poco luz riba e aspecto di calypso den region.
Gregory T. E. Richardson recientemente a obtene su Ph.D na Vrije Universiteit van Amsterdam den e area di Antropologia Cultural riba e tema, “Sweet Breakaway: an ethnographic study of Aruban Calypso Music and the Narratives of the One Happy Island”. Den e estudio etnografico aki el a enfoca riba musica di calypso na Aruba di diferente angulo y e relacion cu discursonan dominante den sociedad.
Den The John Wesley Auditorium San Nicolas por a ilumina / scucha e historia largo di calypso den nos region cu ta un historia importa di mas di 70 aña na nos isla y di cual ta hopi importante pa nos documenta/ investiga y analisa esaki di diferente angulo.
E buki riba su mes ta un desertacion/ estudio riba nivel di doctorado (Phd. ) y den e presentacion a bin dilanti e resultado di tur e estudio aki. Den proceso di investigacion por a tuma nota tambe di investigacion di antropologia den nos region cu semper ta un proceso colectivo, cu aporte di tur hende den comunidad. Sea e calypsonian, historiado y demas investigadonan den colaboracion pa conhuntamente yega na un producto.
Richardson personalmente a enfoca riba calypso festival/ contest cu diferente variante di musica di calypso. Calypso un concepto cu ta general, cu un variente slow y un variante mas lihe ( antes localmente yama Roadmarch ) cu den Caribe y mundialmente yama Soca ( Soul of Calypso ), analisa e canticanan y studia e impacto cu esakinan tabata tin riba nos comunidad y con nan ta reacciona riba nan.
Tambe a tene na cuenta cu e musica di Calpypso no solamente ta bin dilanti den temporada di carnaval of den e espacio di Carnival Village pero e realidad ta cu e musica ta un topico di combersacion pa henter comunidad. Sin limita edad, continuamente ta papia di un of otro cantica, cu si a guste of no como tambe dicon un ta miho cu otro y tambe si a pone atencion riba letra. Locual cu Calypso ta haci ta propaga su mes y no ta keda unicamente den espacio of tereno di Carnival Village pero ta bay mas leu y ta stimula discusion den comunidad. For di e perspectiva ey por bisa cu musica ta impactante y di cual tin cu sigui haci investigacion y documenta esaki.
Como antropologo cultural ta haci uzo di diferente metodologia.
Gregory Richardson ta conta cu ta haci uzo di diferente metodo pa colecciona dato y un di nan ta e analisis di texto di cancionnan pero tambe entrevista personal cu artista/ cantante cu ta participante na festival/ carnaval como tambe analisa literatura y tambe aspectonan musical. Richardson ta enfatisa cu su area no ta riba musica specifico pero mas bien su analisis ta mas basa riba e comportacion “behavioral sience” y den e contexto ey observa con e comunidad ta reacciona riba e musica.
Pa locual ta musica riba su mes lo ta den man di un musicologo pa duna un bista precies riba nota y demas pero den su caso ta mas riba e comportacion y con ta anda cun’e.
Gradicido pa e reaccion/ presencia na tur cu a bin brinda nan sosten. Richardson ta enfatisa riba e importancia pa sigui den e ramo di investigacion. Entre mas hende investiga un miho bista nos lo tin riba nos historia / nos cultura mas ainda como proceso colectivo pa un bista mas amplio. Buki tabata disponibel pa publico aunke limita pero pronto pa proximo presentacion lo tin mas ehemplar disponibel pa tur cu a mustra interes grandi pa esaki.
