Trese talento bèk na e islanan, esei ta e intenshon di FRED (Flinx Recruitment Expo Dutch Caribbean). Pa e di seis biaha e FRED expo lo tuma luga na Hulanda riba 1, 2 í 3 di juni.
FRED ta wòrdu organisá for di 2012 i ta e evento prinsipal pa netwerk i recruitment konektando e islanan antiano i arubiano ku studiantenan í profeshonal biba na Hulanda. Mesun kos ku e promé sinku edishon nan, e evento lo tuma lugá den WTC Rotterdam. E ta duna kompania nan e oportunidat di ekshibí nan mes por medio di un booth i konosé posibel futuro empleado nan.
Organisashon
E profeshonal arubiano Tristan Every í e profeshonal yu di korsou Quincy Sintiago ta organisá FRED for di nan tempu komo studiante na Rotterdam. “Mi a studia na Erasmus Universiteit i tambe biba i traha na Rotterdam pa djesun aña. Komo un studiante, Quincy i ami a eksperensia kon difísil e ta pa mantené kontakto ku kompanianan for di Antia í Aruba. Pa solisitá pa un trabou no papia mes. Esei a enkurasha nos pa kuminsá Fred, pero lihé nos a nota ku bo tin ku bai mas leu ku djis krea un plataforma. E kontakto personal ta keda importante, a pesar di e desaroyo teknológiko nan di awe. Miéntras tantu Tristan i Quincy a muda bek pa Aruba i Kòrsou respektivamente i ta traha ku un team di FRED situá na Hulanda.
WeConnect
E aña aki FRED a buska kooperashon ku WeConnect, un organisashon ku ta yuda hóben i profeshonal ku un trabou, traineeship of stageplek na e isla nan. Lider di WeConnect Tanja Fraai: “E kooperashon ta masha natural í nos ta komplementá otro ku nos netwerk í kontakto nan. Por medio di e Weconnect meet-ups durante aña nos a logra di drenta den kontakto ku hopi hóben ku ta bini di e islanan di Dutch Caribbean. Nan tur nos ta invitando awor aki pa bini FRED.”
Kompanianan
Tin hopi ekspektativa pa FRED; ku ya mas di 30 kompania partisipando, e organisadó nan ta spera ku lo bini sigur un 700 bishitante na e evento. Tristan Every: “Nos motivashon ta simpel, kompania nan semper ta buskando talento. E ta na nos pa sòru pa e kompanianan drenta di kontakto ku e talento ku tin na Hulanda. E aña aki tin hopi interes for di e sektor médiko, ya tin seis instituto partisipando inkluyendo unu for di Saba.”
Programashon
Despues di a tuma un pauze pa un aña, e organisadó nan a renová e programa di FRED. Pa promé biaha lo bai tin un esenario mei mei di e beurs kaminda orador nan lo toka tema nan di suma importansia pa esnan ku ta na Hulanda pero ku interes di regresá pa e islanan.
Na mesun momento ku esaki ta sosodé lo bai tin workshop i presentashon nan den sala nan apart di kompanianan manera Curoil, Damen Shipyards, Curacao Ports Authority, Ernst & Young, ImSan (Medisch Instituut San Nicolas Aruba) i Rijksdienst Caribisch Nederland.
FRED ta kulminá dia 3 di juni ku interviews entre e kompania nan ku a bini FRED i esnan ku ta buskando trabou.
Traineeships.
Durante di e programa prinsipal lo duna atenshon na e TOP traineeship Bonaire, un inisiativa eksitoso di e Ministerio di Binnenlandse zaken en Koninkrijksrelaties ku ta traha huntu ku Openbaar Lichaam Bonaire.
E benefisio di un traineeship, i tambe e esfuerso ku esaki ta rekerí di e kompania lo wordu trata den e presentashon aki. “Kandidato nan ku solisitá pa TOP traineeship Bonaire lo eksperensia e traineeship komo un abraso kaluroso; e apoyo práktiko í e bunita trayektoria pa desaroyá bo mes lo yuda hasi e paso pa regresá Boneiru hopi mas fásil.” Palabranan di e TOP recruiter Judith Brekelmans.
For di Kòrsou, BrightMinds ta trahando ku WeConnect riba un inisiativa pa atraé personal hóben pa asina reforsa den área nan ku mester na instansia nan di gobièrnu. “Mi mes a bini bek despues di studia i traha 14 aña na Hulanda.Ta nos intenshon pa krea un oportunidat atraktivo pa profeshonal nan di Kòrsou regresá i sigui desaroyá nan talento nan.” Palabranan di Clayton Lasten, komersiante di BrightMinds.
Pa mas informashon di Fred beurs: https://fredexpo.com/
