Awe nochi a tuma luga sorteo # 2219 di Fundacion Lotto pa Deporte. E premio grandi tabata un jackpot di no menos di un miyon florin (Afl. 1.000.000,=) pero no tabatin ganado. E numbernan cu a sali tabata 01, 12, 21, 27, 29, Joker 11 y letter I.
Lotto pa Deporte a informa mesora cu e siguiente sorteo di Lotto 5 lo ta diaranson awo dia 22 di september 2021 y cada lotto ta costa solamente cuater florin.
Pa por gana e jackpot, cu a crece y bira Afl. 1.100.000,=, mester tin e cinco numbernan corecto.
Esaki ta prome biaha cu e jackpot di Lotto 5 ta surpasa 1 miyon florin e aña aki! Tradicionalmente e premio ta crece masha lento debi cu e no tin e factor di paga extra pa hisa e premio manera Mini Mega (Plus) si tin.
E ultimo biaha cu a gana e jackpot di Lotto 5 tabata dia 24 di maart 2021 y na e ocasion ey Albertina Q. a gana 300 mil florin! Consecuentemente e jackpot a start di nobo dia 27 di maart 2021 na apenas 100 mil florin. El a crece di maart te augustus unda el a alcansa solamente mey miyon florin. Pero por mira awo, manera custumber, cu asina e jackpot alcansa mey miyon florin, cu mesora mas hende ta ‘purba nan suerte’ cu consecuencia cu e premio ta crece mas lihe. Den un luna di tempo, cu dos sorteo pa siman, a jackpot ya a redobla y a surpasa e bunita cifra di un miyon te yega Afl. 1.100.000,=.
Ta bon pa resalta cu entre aña 2012 pa 2020, Lotto a paga mas di 200 miyon florin na premio entre su hungadonan cu a gana cu e weganan di Lotto. E record di Lotto 5 tabata for di aña 2018, ora e premio grandi a crece te alcansa Afl. 1.650.000,=. Rolando “Grandi” Mèdonnè a gana e premio ey dia 27 di januari 2018 na Nasett Lottery den Bernhardstraat, na San Nicolas. E tempo ey el a cab’i perde trabou y e mesun siman a gana e premio record y a bira ‘miyonario’.
Lotto, e loteria di Aruba ta existi desde 1982 y tin diferente wega; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e weganan di Raspa y Gana. E fundacion a sa di crece benta di e productonan durante e ultimo añanan te alcansa un record na 2017 di 50 miyon florin! Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
