Premio miyonario di Lotto a bolbe cay na Noord

Den e sorteo 1934 awe diaranson di Lotto 5 a saca e numbernan ganado 09-13-19-22-27. Joker ta 06 y letter C. E premio a crece te alcansa 1.1 miyon florin. E premio ganado a cay den e districto di Noord, specificamente e oficina “Lucky Numbers” situa na CITGO Sasaki. Un solo hungado a gana e bunita premio aki.

E aña aki e districto di Noord tin masha suerte. Na inicio di aña a bende Lotto miyonario na Montaña y despues un otro premio miyonario na Palm Beach. Awor e premio a cay na Sasakiweg / Cunucu Abou.

Lotto di Aruba a conoce un benta di mas cu 41 miyon florin na aña 2013. A nota un aumento barbaro na 2014 alcansando mas di 49 miyon florin. Na aña 2015 e benta a cay un poco na 48 miyon, a cay na 2016 na 47 miyon, pero a bons bek duro na 2017 ora cu a alcansa e suma di Afl. 50.478.681,= na benta total, cu ta representa un crecemento di 6.6% compara cu e aña anterior.

Tin mas di 180 rebendedo di Lotto di Aruba, situa tur rond di nos isla. Lotto anualmente ta paga mas o menos 5 miyon florin na comision na rebendedonan, pues ta mira den cada un di nan un bon partner di negoshi. Separa di e mas di 110 miyon florin paga na premio e ultimo 5 añanan, Lotto ta paga comision na rebendedonan y sin lubida BBO na Servicio di Impuesto. Tur esaki ta afecta nos economia den forma positivo.

Pabien na e feliz ganado y pabien na Noord…cu un otro premio miyonario!