Premier Rutte na pueblo: “Nos lo no laga boso na caya,”

Hulanda ta para dilanti un reto grandi pa cu e coronavirus. “Mi no tin un mensahe facil pa trece pa boso. Coronavirus ta bou di nos y hopi lo sufri,” Prome Minister Mark Rutte a bisa den un discurso nacional directamente for di su oficina. “Un gran parti di e poblacion Hulandes lo keda contagia cu e virus.”

Prome Minister Mark Rutte den discurso nacional a expresa su mes riba e forma mas corecto pa atende cu e crisis di coronavirus. Tin hopi reaccion di panico y a pidi pa concentra riba informacion di expertonan so. Hopi hende lo keda contagia, pero cu sintomanan leve.

Medidanan a wordo tuma hustamente pa motibo cu expertonan mes a bisa cu e grupo infecta lo bira hopi mas grandi, Prome Minister Rutte a expresa.

Tin tres scenario cu por scoge di dje pa implementa y Gobierno a scoge pa e prome scenario unda cu e immunidad di un grupo controla ta sigui creuce, te ora cu yega na un vacuna.  E personanan cu a haya e virus, ta bira immuun. “Mas grandi e grupo aki, mas chikito ta bira e chens cu e virus aki por bula pa e grandinan cu ta mas vulnerabel of esnan di salud debil,” e mandatario a bisa. P’esey a scoge e scenario aki pa controla lo maximo e plamamento di e virus. Pero lo por dura varios luna, of mas, pa e grupo immuun aki crece. “Mientrastanto nos mester trata di protege mas tanto posibel e personanan cu mas riesgo ta core.”

Si no tuma medida, e cuido di Hulanda lo no tin suficiente capacidad pa atende cu tur e pashentnan y esaki mester trata di evita.

Tur conseho te awo y medida tuma ta pa controla e plamamento den forma maximal, via di cierre di horeca y evita eventonan publico. Con hopi esaki ta dura, ta debi na e comportacion di  virus. Algun di e medidanan por wordo suavisa, pero tur cos ta depende di e desaroyo.

Hopi hende ta preocupa pa nan cupo di trabou mirando con hopi comerciante ta para lomba contra muraya, for di esnan mas chikito te na esnan mas grandi. “Gabinete lo haci tur cos pa yuda boso, pa evita cu boso negoshi ta cay y e trahadonan no ta perde nan trabou. “Nos lo no laga boso na caya,” el a expresa.

El a haci apelacion na tur hende pa sigui tur medida di prevencion y a gradici tur cu ta contribuyendo den e situacion di crisis.

“Hunto nos lo surpasa e tempo dificil aki. Cuida di otro y mi ta confia riba boso”.