Premier Rhuggenaath no a bay New York

Prome Minister di Corsou, Eugene Rhuggenaath (PAR) a dicidi di cancela su bishita di trabao pa New York y Washington. E mandatario a duna prioridad na e presupuesto y finansas publico di Corsou cu mester pone na ordo prome. E meta en realidad di Rhuggenaath tabata pa bay e fin di siman aki pa New York, pa asina asisti na e Asamblea General di Nacionnan Uni. Hunto cu e Prome Ministernan di e otro paisnan dentro di Reino y Su Mahestad Reina Maxima.

Despues di esey e lo a bishita Washington pa prome biaha den su calidad como Prome Minister pa algun reunion importante, manera e futuro di e refineria. Sinembargo, e Prome Minister a pospone e biahe pa algun siman.

“Mirando e hecho cu CFT lo bin bek e siman aki riba nos contestanan di dia 12 di September, mi ta haya ta mas importante pa ta hunto cu mi Gabinete. Finansas publico mester wordo poni na ordo mas pronto posibel. Esey no ta solamente tarea di Minister di Finansas Gijsbertha, pero di henter e gabinete y den esaki, mi ta hunga un rol grandi,” asina Premier Rhuggenaath a splica. E situacion financiero actual a percura alabes cu e gobierno mester a tuma medidanan mas severo.

“Tur biahe di trabao mester wordo bon evalua pa mira si e tin un balor agrega. Mester screen esaki prome. Mirando e gastonan y e señal cu como mandatario tin cu duna, mester evalua esaki bon, mirando e trayecto cu CFT, mi a yega na e conclusion cu esey tin prioridad,” segun Prome Minister. Un di e motibonan principal pakico Corsou lo kier a bay Nacionnan Uni, ta cu “tur hende ta eynan”.

“Aña pasa mi a papia cu e Minister di Asuntonan Exterior di Venezuela eynan. Y durante mi ultimo bishita na Conseho di Siguridad di Nacionnan Uni, mi a topa cu representantenan di varios pais di Caricom. E reunionnan aki ta bon pa tene combersacionnan bilateral. Ta reunionnan importante y a base di esey mi lo kier ta eynan. Pero mi mester a haci un escogencia y mi ta pensa cu e miho escogencia ta pa Corsou”, asina Prome Minister Rhuggenaath a comenta cu el a indica na Prome Minister Hulandes, Mark Rutte di su ausencia pa e yega na e decisionnan aki. Y tambe el a indica cu awor aki ta prioridad, pa tin un bon presupuesto y finansas publico na Corsou na e momentonan aki.

Comments

comments