E Prefinals di Aruba Caiso & Soca Monarch 2023 a tuma luga na november 2022. Un concepto nobo, pa duna cada produccion mas tempo pa resona prome cu e anochi final di e festival y competencia musical mas grandi di nos isla.
E formula aki ta dunando su frutonan, mirando e acogida cu varios cancion ta ricibiendo caba. Esaki lo resulta den un miho ambiente durante paradanan di Carnaval, pero tambe lo fortalece e posicion di e genero di musica Soca y genero di Caiso den nos cultura. Generonan di musica Caribense cu ta mundialmente reconoci, sin ta necesariamente limita na un temporada di anja.
Esunnan cu no a logra ta presente na e Prefinal na Centro di Bario Dakota, Centro di Bario Playa Pabao y Centro di Bario Brazil, por abona rib’e YouTube Channel www.youtube.com/arubacaisosocamonarch 3647. Aki por mira y scucha cada artista cu a participa na e Prefinals di Aruba Caiso & Soca Monarch 2023.
Stichting Musica ta gradici Telearuba pa e grabacion di Prefinal y ta informa cu lo transmiti e Prefinal riba diabierna, 20 di januari pa 7:00pm y diasabra, 21 di januari pa 2:40 PM na television via canal 13.
Di e forma aki, tur hende por cera conoci cu e finalistanan cu a logra pasa pa e anochi final di Aruba Caiso & Soca Monarch, cu lo tuma luga riba diasabra, 28 di januari 2023.
Stichting Musica ta gradici Setar NV, Ban Serio (un iniciativa di Aruba Tourism Authority), Aruba Bank, Aruba Airport Authority, Balashi, Telearuba y Elite Productions & Entertainment pa haci Aruba Caiso & Soca Monarch 2023 posibel.
