PPA: Parlamento a aumenta impuesto y despues biaha pa Panama y Hulanda

“Staten a pasa crisisheffing estilo atraco den saco pa despues biahamento cu delegacionan absurdamente grandi a inicia?”, asina Benny Nisbet, Lider Politico di PPA a puntra dialuna anochi. “Despues cu Staten a haci nan esfuerso pa convence pueblo cu tin un crisis serio y cu esey ta hustifica Gobierno pa hinca man den saco di pueblo, no a dura mucho pa e mesun Staten cuminsa biaha, anto cu delegacionan amplio”, segun e ex Minister y Parlamentario di partido PPA.

E ta referi na un delegacion cu a biaha pa Panama consistiendo di 4 miembro di MEP y 1 di POR. No ta conoci si miembronan di AVP y RED a bay Panama.

Despues a sali un delegacion hopi amplio pa atende reunionnan di IPKO na Hulanda.

“E potret aki ta refleha Presidente di Staten, Addy Thijsen y 5 miembro di fraccion di MEP. Riba e potret nan ta den compania di MinPres Evelyn Wever-Croes y GevMin Besaril. Si tene cuenta cu Fraccion di MEP a biaha cu 5 miembro, AVP tambe tin derecho riba 5 miembro, POR 1 y RED 1 pa suma un total di 13 miembro di Staten for di 21 cu awor ta na Hulanda….well well. Anto tur esaki directamente despues cu a practica e atraco den saco di pueblo!”, asina Benny Nisbet a critica.

E ta sigui splica cu den pasado semper mester a tene un mayoria di 11 miembro di Staten na Aruba. E regla aki a pone un blafon cu maximal un delegacion di Staten por ta 10 miembro den cual tin e Presidente. “Awe aparentemente NO tin respet pa e regla aki mas, 13 miembro for di 21 miembro ta biaha pa Hulanda costando un dineral mientras ta splica pueblo cu tin crisis y mester hala faha mara….Crisisheffing den bo curpa, mientras cu nan si ta gasta placa pa loco”, asina Benny Nisbet a termina bisando.