Durante e ultimo siman, e discusion riba e ahustacion di BBO/BAZV y awor cu BAVP acerca, atrobe e fenomeno di “Landsbijdrage” pa cu AZV ta hopi den noticia. Benny Nisbet di Partido PPA a señala cu Landsbijdrage ta e suma di placa cu tabata parti di presupuesto di Aruba dedica na por ehempel Salud Publico. Na momento di forma AZV a dicidi cu lo tin tres ‘geldstroom’ pa sostene AZV, esta e Landsbijdrage, Premie di doño di trabao y e Premie di e trahado.
Benny Nisbet a sigui bisa cu “A consecuencia di mal maneho di AVP nan a dicidi di introduci un BAZV y nan a baha e Landsbijdrage di Gobierno, algun tempo despues AVP a ripiti esaki, cual ta nifica cu e contribucion di Gobierno ta baha pero esun for di saco di pueblo ta aumenta! PPA semper a cuestiona e maneho aki severamente”.
Benny Nisbet a enfatisa cu ora Aruba a haya un Gobierno social-democrata PPA a kere cu aki e abuso di pueblo lo a yega su final. Sinembargo Gabinete Wever-Croes a scoge pa continua cu e mesun maneho!
“A baha e Landsbijdrage di Gobierno y a aumenta BAZV! Esaki ta mescos cu bo ta aumenta e belasting riba lomba di pueblo, pero pa colmo e Gobierno ta ‘Social-Democrata? Aki a anuncia tambe den e Memorie van Toelichting riba e presupuesto cu nan maneho lo ta pa finalisa e Landsbijdrage di Gobierno completamente, cu otro palabra e contribucion di Gobierno di e suma di placa cu semper tabata pa Salud Publico lo bira nihil, pues 0 y e contribucion di pueblo lo aumenta substancialmente y no lubida cu ainda Gobierno kier pasa diferente tarea cu awe no ta parti di AZV pa e presupuesto di AZV cu lo aumenta e contribucion di pueblo substancialmente!”, segun e lider politico.
El a termina bisando cu “PPA no ta di acuerdo cu e maneho aki cu no ta un maneho ‘social democrata’ y no tin e ser humano como central”, asina Benny Nisbet a splica.
