Despues cu Embahada di Hulanda na Santo Domingo y Washington a bati alarma y señala Endy Croes, Parlamentario di MEP, como un posibel facilitado di traficacion di hende, awor kier sigura cu tur pais den Reino Hulandes ta mas pendiente. E Ministerio di Asuntonan Exterior lo topa cu ehecutivonan di St. Maarten, Aruba y Corsou na Sint Maarten e siman aki den un cumbre anual, cu Secretario di Estado Knops presente. Riba agenda tin tambe e reto di traficacion di hende, unda posiblemente lo mustra con un Parlamentario por a burla di e sistema!
Reino Hulandes ta duna masha atencion na e asunto di reglamento di VISA, pasobra maneho di VISA ta responsabilidad di Reino y no di e paisnan individual. Asina ta conoci cu maneho di relacionnan exterior tambe ta resorta directamente bou di Reino Hulandes. Na momento cu e islanan laga stranheronan drenta cu de facto, no mester a drenta, den cierto forma ta permitiendo e hendenan aki haya acceso na Reino Hulandes y despues hasta por yega Europa. Ey tin multanan halto pa paisnan cu haci e tipo di erornan asina!
Den e caso specifico aki, Hulanda a manda informa Aruba debidamente cu nan tin sospecho serio riba Endy Croes, pasobra no un ni dos, sino mas biaha a pidi VISA pa stranheronan supuestamente bin hunga softball na Aruba y te awe ainda nan tey. Esaki no a sosode e aña aki, sino e ultimo añanan. Cu Hulanda a manda carta of email pa informa, nos ta laga pa esunnan responsabel mes contesta. Nos ta reta Gobierno y e Parlamentarionan cu a sali defende corupcion, cu nos ta SIGUR cu tin un comunicacion (tradicional of moderno) entre Gobierno di Hulanda y Aruba den cual a informa di e investigacion cu nan a cuminsa na Merca. Sino ta con Aruba a haya sa anto y cu Endy Croes a sali core admiti cu di 2 mil hende cu el a yega di trece (mentira) cu isas 4 of 5 a keda atras?
E escencia di henter e investigacion ta, cu Endy Croes deliberadamente ta bin cu hendenan Aruba y laga nan keda atras. Di e forma ey, ta haci uzo di e sistema di Visa pa deporte, pa bin biba y traha na Aruba. Fuentenan den Warda nos Costa a confirma cu nan a detene mas o menos 10 di e stranheronan aki e ultimo añanan. E pregunta ta, ken ta core cu e gastonan e ora? Pasobra Gobierno mester a paga pa manda e “deportistanan” aki bek nan pais, siendo cu esun cu a para garantia pa nan ta laba man.
Cu na Aruba e Gobierno na mando y e Parlamentarionan cu ta sostene Gobierno a opta pa “lage pasa numa”, no ta hayando sosten di Hulanda. Ey si nan ta mira e hecho aki como algo sumamente serio, specialmente pasobra a adverti e Parlamentario di su actonan pero a opta pa ripiti y haci atrobe manera “nos ta manda”.
Departamento di Asuntonan Exterior di Aruba lo atende e reunion na Sint Maarten e siman aki y lo mester responde kico Aruba lo haci pa su Parlamentarionan no sigui uza Visa Deportivo como un “verkapte vergunning” pa biba y traha na Aruba.
