Awe Colegio Arubano a participa na 300 alumno di HAVO y 92 alumno di VWO, ken a obtene nan diploma despues di e prome periodo. E porcentahe di graduado pa HAVO ta 66% y pa VWO ta 90%. Aña pasa, despues di e prome periodo, a gradua pa HAVO 58% y pa VWO 72%.
Pa prome biaha den historia di scol, e alumnonan a haci casi tur examen na distancia. E alumnonan cu no a gradua, por haci herexamen pa 2 materia otro siman. Nan ta haya e resultado dia 5 di juni.
Aña pasa, despues di e di dos periodo, e total di examinadonan cu a gradua tabata 70% pa HAVO y 78% pa VWO. E aña di examen aki ta uno particular pa motibo de e crisis di Corona. Den luna di maart Minister di Enseñansa di Aruba a dicidi, siguiendo e pasonan di Hulanda, cu no lo tin examen central final por escrito.
Determinacion di e cifra final di un materia ta a base di e examennan escolar (SE). E diferencia aki no tin influenia riba e balor di e diploma, ni riba e posibilidadnan pa sigui cu un estudio avansa na un HBO of universidad.
Un otro diferencia cu añanan anterior ta cu mester a sigui e medidanan di Corona di gobierno y tabata imposibel pa haci e examennan na scol. P’esey a tuma mayoria di e examennan na distancia.
Un palabra di gradecimento na e docentenen di Colegio cu a kere den e
candidatonan pa examen; na mayor di e examinadonan cu a keda motiva nan yiunnan; na tur alumno candidato pa examen, pa nan pasenshi den e ultimo lunanan den cual tabata tin hopi incertidumbre. Un danki special na tur docente te cu scol avansa, pa cada granito cu nan a aporta na e desaroyo di e graduadonan di HAVO y VWO di aña 2020.
