POR ta sostene prolongacion di ceramento di frontera cu Venezuela

Parlamentario Alan Howell (POR) ta contento di tende cu Gobierno lo mantene frontera cu Venezuela cera pa por lo menos 3 luna mas. El a indica cu Fraccion di POR ta sostene e decision aki di Gobierno y ta bisa cu tur hende sa cu e situacion na Venezuela no ta mehorando y por hasta bay asina leu di bisa cu e ta birando pio.

Teniendo esaki na cuenta, e fluho di personanan cu kier bin nos pais, specialmente di forma ilegal, ta bira mas grandi y manera debe ser, Gobierno ta tene cuenta cu e siguridad y stabilidad di nos pais. Pa tal motibo Gobierno a prolonga e ciere di e frontera cu Venezuela pa 3 luna mas.

Den mesun cuadro aki, Howell a felicita esunnan cu den fin di siman a logra detene e grupo di 10 persona cu kier a drenta ilegal na nos isla y a indica cu lo bay haci pregunta na Minister di Husticia pa sondea e posibilidad di bin cu otro pasonan pa evita cu e personanan aki yega tera.

Un ehempel cu el a duna ta pa detene e personanan cu kier drenta den forma ilegal riba lama mes, laganan bira bay bek nan pais, es decir hibanan te na awanan teriotorial Venezolano bek. Di e forma aki, den opinion di Alan Howell, ta evita un gasto y peso grandi pa Aruba y lo por tin menos dolor di cabes pa ora mester deportanan.