Por spera mas exodo di refugiadonan Venezolano

E ehecutivo pa derechonan humano di Nacionnan Uni a presenta un rapport devastador riba e situacion na Venezuela y e regimen represivo di Presidente Nicolas Maduro: Door di violencia tin centenares di morto pa luna, ta tortura presonan y tin hamber tur caminda. “Si e situacion no mehora, e exodo sin prescedente di migrante y refugiadonan lo sigui.”

Un unidad elite special di Polis a mata no menos cu 1569 ciudadano den e prome 4 lunanan di e aña aki. Segun e rapport, e ehecucionnan aki ta forma parti di un “strategia dirigi pa neutralisa, oprimi y criminalisa miembronan di oposicion.” Famia di e victimanan ta conta con tropanan elite ta envadi casnan, ta tira hobennan y ta horta den casnan.

E ehecutivo di derechonan humano, Michelle Bachelet, aa expresa su preocupacion pa e situacion humanitario den e pais. E salario minimo di baina ta yega 7 dollar Mericano pa luna, desnutricion ta un problema grandi y tur luna centenares di Venezolano ta muri door di falta di atencion medico y/of remedi. 

Gobierno di Presidente Maduro ta haya cu e rapport ta un “analisis selectivo y unilateral di e situacion di derechonan humano.” Maduro a hasta papia cu Bachelet, como tambe cu e otro funcionarionan di e Gobierno. Den un reaccion riba e investigacion, Gobierno di Venezuela a indica cu Bachelet “a nenga e informacion ofreci di parti di Gobierno di Venezuela”.

Comments

comments