Diadomingo marduga 9 di februari, un patruya di polis den persecucion di un auto Toyota Vitz pa un rato, a bin logra na changa chauffeur di e auto Ayden Lanoy di 19 aña, den Madiki Kavel algo despues di 5:00 AM di marduga.
Ora cu e jeep di polis a pensa cu nan a logra di changa e auto aki y por bay over na investiga motibo di con e hoben chauffeur no kier a duna oido na polis nan señal pa para, a surgi un situacion caminda e hoben chauffeur a logra di maniobra cu su auto pa bay direccion di un espacio cu polisnan a laga habri.
Sinembargo tin indicacion e dos oficialnan di polis na e momentonan ey a baha for di e SUV policial pero a ripara intento di e chauffeur pa bandona e sitio un biaha mas ya cu a keda un espacio hancho habri.
Esaki lo a pone e polisnan dicidi di los algun tiro riba e auto caminda despues a bin resulta cu un total di 18 tiro a ser dirigi riba e auto caminda un di nan a alcansa e hoben Lanoy cu a bin ocasiona su morto algun instante despues.
Awe despues di casi seis siman di e incidente aki, ainda Landsrecherche ta haciendo su investigacion riba e caso tristo aki caminda Cuerpo Policial a ser someti na un presion increibel caminda comunidad a condena e hecho cu a los un total di 18 bala riba un hoben cu no tabata ni arma ora cu el a core pa polis.
E hoben a fayece na e sitio y for di e caso aki, a surgi un desaprobacion formal pa e forma di actua di e dos oficialnan di polis, cu a los un total di 18 tiro riba e auto di e hoben.
Awe casi seis siman despues di e incidente fatal aki, un testigo cu tabata na e sitio di e incidente fatal aki, a manda un grabacion cu el a haci, caminda takelwagen a transporta e auto di e hoben Lanoy cu a wordo confisca pa autoridadnan policial.
For di e dia ey ningun hende a scucha algo di Landsrecherche kende ta encarga cu e investigacion pero riba e grabacion cu a wordo divulga ayera, ta mustra cu den e dos portanan na e banda robes di e auto, tabatin 5 perforacion di bala y e lo por ta 6 total loke ta duna indicacion cu di e cantidad di 18 tiro, ya cu recherchenan a haya 18 huls na e sitio, polisnan a faya cu 13 tiro cu lo no a alcansa e auto, of cu por a pega na e otro banda di e auto.
E caso ta keda uno sumamente sensitivo, ya cu un hoben a perde su bida bou di circunstancianan cu simplemente no mester a tuma luga, mas ainda ora cu e zonido di tironan por a ser scucha riba grabacionnan cu a haci e incidente ainda mas dramatico.
E dos agentenan envolvi ainda ta na cas y nan prohibicion pa drenta warda di polis ainda ta vigente ya cu e proceso no a keda cla ainda y investigacion ta continuando dor di Landsrecherche.
Hecho ta cu no por persigui e polisnan pa asesinato ya cu nan tabata eherciendo nan trabou caminda a duna un orden pa para na un chauffeur kende no a respeta e orden aki di e polisnan.
Ta ser anticipa cu e polisnan aki lo por wordo manda pa un otro departamento di husticia pero tur cos ta indica cu por lo pronto nan lo no ser permiti pa fungi como oficialnan di polis cargando arma.
Por lo pronto ainda Landsrecherche no a keda cla cu su investigacion y tin tur indicacion cu ta te den luna di juni of juli esaki lo keda cla.
