Parlamentario di e fraccion di POR, Alan Howell, ta analisando e construccion di hotel na San Nicolas y mesora a haci pregunta na Minister Otmar Oduber, entre cual ki dia specificamente lo pone e prome piedra, pasobra un gran parti di hendenan na Aruba y pariba di brug ta den expectativa pa e hotel aki. Tambe e ta interesa pa sa con lihe ta pensa di traha e hotel aki y den cuanto fase.
Tambe ta desea di sa con e proyecto aki lo contribui na desaroyo di infrastructura general di pariba di nos isla. Alan Howell a expresa cu Fraccion di POR ta para 100% tras di e hotel na San Nicolas y pesey mes nan no kier pa e fria y ta desea di haya sa ki dia lo bay pone e prome piedra.
Igualmente Howell a indica cu lo bay manda tambe diferente pregunta pa Minister Glenbert Croes relaciona cu e aspecto laboral pa loke ta e desaroyo aki. E fraccion color blauw den Parlamento kier sa ki dia lo bin cu un help desk of info desk caminda ciudadanonan, specialmente esnan di pariba di brug por busca informacion of por cuminsa prepara nan carta pa solicita den e diferente nivelnan cu lo habri cu e hotel nobo. E ta puntra su mes cuanto cupo di trabou e proyecto aki lo genera pa nos pueblo.
Alan Howell a pidi tur partido y politico pa no bay haci wega cu e desaroyo nobo, pa por fabor wak pa dilanti, pa wak bienestar di Pais Aruba. “Mester mehora economia di nos pais, tur hende sa cu no por depende mucho mas riba CITGO, e situacion den cual CITGO ta na e momentonan aki ta peor cu un garoti kibra y pa fortalece nos economia esaki ta e momento pa despues di 60 aña cu e prome hotel grandi a bin na nos isla, cu San Nicolas por haya su fair share y San Nicolas merece tambe un hotel di 5 strea”.
