Inscripcion ta habri pa entrega nominacionnan pa Copa Hubenil Gobernador Felipe B. Tromp pa aña 2025. Ultimo dia pa entrega un nominacion lo ta diabierna 18 di april 2025. Por haci e entrega di nominacion via e link.
Nomin’e via e link indica riba ATHA su pagina di Facebook; https://form.jotform.com/240794581485367 of via email adres: [email protected]
E descripcion por ta acompaña pa potret, recorte di corant etc y cu nomber y telefon di e persona of instancia cu ta haci e nominacion.
A institui Copa Hubenil Gobernador Felipe B. Tromp na aña 1992, despues cu e prome gobernador di Aruba, Felipe B. Tromp a pasa e encargo pa Gobernador mr. Olindo Koolman.
Felipe Tromp a nace na Aruba riba dia 15 di october 1917 y a fayece riba dia 12 di augustus 1995. E tabata un persona hopi activo riba tereno social y cultural. Por menciona cu e tabata den diferente organisacion cultural manera Fundacion Centro Cultural. E fundacion aki tabata responsabel pa desaroya e campo cultural na Aruba cu ayudo di e fondo Hulandes Sticusa durante e periodo 1948 pa 1991. Ya na 1984 a cuminsa pasa e fondonan directamente pa Aruba.
