Por cuminsa inscribi pa cursonan di Horticultura Basico y Aguaponic

Departamento di Agricultura, Cria y Pesca (DLVV) Santa Rosa hunto cu Enseñansa pa Empleo (EPE) semper trahando hunto na bienestar di Sector Primario. Pa varios tempo caba esaki ta tumando luga di cual e cooperacion ta sigui na bienestar di esnan cu ta desea di siña algo den e ramo aki di agricultura.

Manera ta custumber cu via di EPE tur curso di Horticultura Basico ta wordo regla y organisa. Mayoria curso tin un duracion di 6 siman largo. Cursonan ta dos bes pa siman cu ta bira tur dialuna teoria na edificio di EPE y tur diasabra practico ta na edificio di Santa Rosa. Tur dialuna lo ta di 7 pa 9’or di anochi y tur diasabra cu ta na Santa Rosa lo ta di 7’or pa 9’or di mainta. Tanto Horticultura Basico y Aguaponic lo cuminsa den luna di September venidero.

Sta Rosa ta haci un apelacion na tur esnan cu ta interesa den un di e cursonan aki cu ta Horticultura Basico of Aquaponic pa tuma contacto cu Enseñansa pa Empleo (EPE) na telefon 582-5652 pa mas informacion. Por haci esaki tambe via nan portal digital cu ta www.epearuba.com y sigui e pasonan pa yena tur bo informacion. Por pasa na nan oficina tambe situa na Engelandstraat 33.

Tene na cuenta si cu esnan cu ta desea di inscribi pa e curso di Aguaponic mester tin diploma di Horticultura Basico pa sigui e curso aki. Asina ta si bo ta interesa den un di e curso nan aki percura pabo inscribi bo mes mas pronto posibel pasobra cupo ta limita.