Diferente otro establecimento lo habri nan portanan dialuna awo. Prome Minister Evelyn Wever Croes den un conferencia di prensa a splica cu e negoshinan cu a habri den e dos prome fasenan a bay bon y a constata cu no tabatin contagio local.
Esaki ta motibo cu Fase 3 ta drenta na vigor dia prome di juni, cu ta dialuna awo. Den e grupo aki ta inclui weganan di number (gamble), menos casino. Sinembargo, pa motibonan cu no a splica, e benta di number no por bay mas laat cu 6.30 di atardi.
Otro establecimentonan cu ta habri den e fase aki ta restaurantnan cu ta sirbi cuminda paden, panaderianan cu tin espacio pa e hendenan sinta paden bebe koffie y come algo, y tambe e barnan. Operadornan mester tene cuenta si cu e orario di cierre durante henter e fase 3 ta 10’or di anochi.
Otro sectornan cu ta habri ta Spa, Salonnan di Masashi y Sauna. Aunke cu ta dificil, ta pidi pa tur esnan trahando den e sectornan aki pa tene cuenta cu distanciamento social y higiena. Percura cu tin hand sanitizer y cumpli cu tur loke ta para den e protocolnan.
Negoshinan cu falta pa habri ainda ta entre otro casino y clubnan nocturno.
