Siman pasa Alan Howell como miembro di Fraccion di POR den Parlamento a reuni cu Presidente, Vice Presidente y miembronan di San Nicolas Business Association (SNBA). E reunion tabata hopi ameno, fructifero y positivo. A elabora y intercambia di opinion y idea riba diferente topico di interes pa e parti pariba di nos isla. E tema mas importante riba agenda tabata e hotel pa San Nicolas, un proyecto anhela pa añanan largo y tur loke esaki ta nifica pa pariba di brug, sin laga afo e ‘spin-off effect’ economico cu e lo trece cune.

Despues di e reunion, Alan Howell a sigura cu e proyecto hotelero na San Nicolas lo yuda reduci e desempleo cu tin pariba di brug, cual ta entre esunnan mas halto na Aruba, lo trece movecion den caya na San Nicolas, crea trabou pa esnan cu ta traha pabou, pa keda cerca di nan cas logrando mas tempo pa comparti den famia y ta reduci gastonan di transporte.

Igualmente a atende riba diferente otro proyecto cu lo contribui na un desaroyo economico pa San Nicolas.

Alan Howell ta expresa cu loke por bisa cu pleno siguridad ta cu SNBA ta para firme tras di e proyecto hotelero pa San Nicolas y nan ta pronostica cu esaki lo trece un cambio grandi den e desaroyo economico na San Nicolas den tur sentido

San Nicolas tin tur derecho di rebiba bek, San Nicolas tin tur derecho pa lo miho y San Nicolas merece ‘the best’”, Alan Howell a conclui bisando.

Comments

comments