Aunke cu Jeffrey Dimitri (di) Carlo, politico y psycholoog, a nenga categoricamente e acusacion di inmoralidad cometi cu un mucha homber menor di edad, Corte a yega na e conclusion cu e ta culpabel. Awe riba dia di Derechonan di Mucha, Corte a declar’e culpabel di a mishi cu un mucha homber di 15 aña.
Fiscal a pidi den e caso aki un castigo di 24 luna di cual 2 luna ta condicional y tres aña di prueba. Corte a yega na un castigo similar, esta 24 luna di cual 6 luna ta condicional y 3 aña di prueba. E acusado a scucha e castigo via di video call na KIA. E tin dos siman di tempo pa apela e decision aki.
Lisette Gomes a splica cu e caso aki ta diferente pasobra e acusado envolvi ta un psycholoog, un profesional cu mester sa miho. “Hopi lo bisa cu e castigo ta poco. Pero mester tene cuenta cu aki na Aruba mishimento ta hopi dificil pa proba. Den e caso aki hues a haya cu tin suficiente prueba di apoyo cu ta demostra cu el a mishi cu e parti intimo di e mucha homber y a dun’e un castigo di dos aña,” e activista a splica.
Mirando tur e 10 añanan cu e tin trahando riba e tereno aki, toch Gomes ta bisa cu e ta satisfecho cu e castigo impone, si mira cu antes den hopi caso e sospechosonan ta sali liber. Esaki pasobra e ta un delito hopi dificil pa prueba.
E mes ta na altura di dos otro caso mas cu nomber di e acusado aki a ser menciona, pero lamentablemente pa berguensa e mayornan no kier entrega keho. El a trata di convence nan pero sin resultado. Si e por bisa cu no ta prome caso cu nan ta tende riba e persona aki.
Na mesun momento el a desmenti cu e persona aki den pasado a traha cu su fundacion. Di Carlo a bini Aruba pa habri su mesun consultorio y nan tabatin nan oficina den e mesun edificio
Condenado
Jeffrey Dimitri di Carlo ta un psicologo di profesion, tabata vincula den e wega di placa di Karatbars y ta politico di partido PPA/UPP den e ultimo eleccion. Dimitri di Carlo awo tin un sentencia di dos aña di prizon, condena como pedofiel.
